Ազգերի լիգայի B դիվիզիոնի երրորդ տուրում Հայաստանի ազգային հավաքականը վաղը Լեհաստանի Լոձ քաղաքի «Միեյսկի» մարզադաշտում կմրցի Ուկրաինայի հետ։ Այս հանդիպումը պետք է կայանար Լվովում, սակայն ռուս-ուկրաինական պատերազմի հետևանքով ՈւԵՖԱ-ն որոշում էր կայացրել փոխել մրցավայրը։ Մրցաշարային առումով վաղվա խաղը ավելի քան կարևոր է Հայաստանի հավաքականի համար։ Երկրորդ տուրից հետո մեր ազգային թիմը 3 միավորով երրորդն է ենթախմբում։ Նույնքան միավոր ունեն նաև առաջին և երկրորդ հորիզոնականներում գտնվող Շոտլանդիան և Ուկրաինան։ Այս հավաքականները սակայն մեկ հանդիպում ավելի քիչ են անցկացրել։ Առաջին հորիզոնականի համար պայքարը շարունակելու համար վաղը մեր հավաքականին անհրաժեշտ է գոնե չպարտվել։ Ուկրաինայի և Շոտլանդիայի հավաքականները մրցակիցներն էին նաև 2022 թվականի աշխարհի առաջնության փլեյ-օֆֆի կիսաեզրափակչում։ Հունիսի 1-ին Գլազգոյում տեղի ունեցած մրցավեճում Ուկրաինայի հավաքականը Յարմոլենկոյի, Յարմեչուկի և Արտյոմ Դովբիկի խփած գոլերի շնորհիվ առավելության էր ասել դուրս գալով եզրափակիչ։ Հունիսի 5-ին տեղի ունեցած վճռորոշ խաղում Ուկրաինան 0։1 հաշվով զիջել էր Ուելսին։
Վերջինս հաջողության էր հասել նույն Յարմոլենկոյի ինքնագոլի արդյունքում։ Ուկրաինան ունենալով հսկայկան առավելություն և բազմաթիվ գոլային պահեր, այդպես էլ չէր կարողացել փրկել խաղը։ Ուկրաինան ելույթ չի ունենա այս տարվա նոյեմբերի Կատարում կայանալիք աշխարհի առաջնության եզրափակիչ փուլում և հիմա ուշադրությունը կենտրոնացրել է Ազգերի լիգայի վրա։ Արդեն հունիսի 8-ին Ուկրաինայի ազգային թիմը մեկնարկելով Ազգերի լիգայում Դուբլինում 1։0 հաշվով առավելության հասավ Իռլանդիայի նկատմամբ։ Հավասար պայքարում տեղի ունեցած մրցավեճում ուկրաինացիներին հաղթանակ պարգևեց 48-րդ րոպեին Վիկտոր Ցիգանկովի տպավորիչ գոլը։ Փաստորեն, վաղը Ուկրաինայի հավաքականը 10 օրվա ընթացքում 4-րդ հանդիպումը կանցկացնի։ Ի դեպ Իռլանդիայի դեմ Ուկրաինան խաղը սկսել է ոչ մարտական կազմով։ Պահեստայինների նստարանին էին մնացել թիմի առաջատարներ «Մանչեսթեր Սիթիի» պաշտպան Ալեքսանդր Զինչենկոն, «Ատալանտայի» կիսապաշտպան Ռուսլան Մալինովսկին, իսկ Ռոման Յարմեչուկն ու Անդրեյ Յարմոլենկոն ընդհանրապես հայտավորված չեն եղել խաղին։ Բնական է երկու ծանր հանդիպումնրից հետո Ուկրաինայի ազգային թիմի գլխավոր մարզիչ Ալեքսանդր Պետրակովը հանգստանալու հնարավորություն էր տվել առաջատարներին։ Հավանականությունը մեծ որ Հայաստանի հավաքականի դեմ Ուկրաինան նորից կպայքարի մարտական կազմով։
Դուբլինում գրանցված արդյուքը սակայն ցույց է տալիս, որ մեր առաջիկա մրցակիցը մեծ ռեզերվ ու ներուժ ունի։ Այս պահին Ուկրաինայի հավաքականի ճամբարում գտնվող 27 ֆուտբոլիստների տրանսֆերային ընդհանուր արժեքը 213․3 միլիոն եվրո ։ Հայաստանի հավաքականի ֆուտբոլիստների տրանսֆերային հանրագումարն այս պահին 21․53 միլոն եվրո է։ Ուկրաինայի հավաքականի ամենաթանկ ֆուտբոլիստը Մալինովսկին է, որի տրանսֆերայի արժեքը 28 միլիոն եվրո է։ 25 միլիոն եվրո է գնահատված Ալեքսանդր Զինչենկոյի տրանսֆերային գինը։ Ուկրաինայի հավաքականում այս պահին կա ընդամենը մեկ ֆուտբոլիստ, որի տրանսֆերային արժեքը մեկ միլիոն եվրոյից քիչ է։ Խոսքը փոխարինող դարպասապահներից Անդրեյ Պյատովի մասին է։ Թիմի հիմնական դարպասապահ Գեորգի Բուշչանը Ուելսի դեմ խաղում վնասվածք է ստացել և բաց կթողնի Հայաստանի հավաքականի դեմ հանդիպումը։ Որակազրկման պատճառով վաղը խաղադաշտ դուր չի գա Պրահայի «Սլավիայի» կիսապաշտան Տարաս Կաչարաբան։
Ինչևէ վաղը կկայանա hայ-ուկրաինական ֆուտբոլային 9-րդ դիմակայությունը։ 1997-2003 թթ․ Հայաստանի և Ուկրաինայի հավաքականներն աշխարհի և Եվրոպայի առաջնության ընտրական շրջափուլերում անց են կացրել 8 հանդիպում։ Դրանցից 5-ն ավարտվել է Ուկրաինայի հաղթանակով, իսկ 3 խաղում գրանցել է ոչ-ոքի։ Լիահույս ենք, որ 9-րդ խաղում մեր հավաքականին կհաջողի առաջին հաղթանակը տանել ֆուտբոլային հակամարտությունում։
