Չինաստանի մշակույթի նախարարությունը արգելել է համացանցում տեղադրել 100 հայտնի երգեր, այդ թվում՝ Լեդի Գագայի, Բեյոնսեի, Backstreet Boys և Take That խմբերի երգերը, որոնք կարող են վնաս հասցնել պետության մշակույթին: Այս մասին հայտնում է France Presse գործակալությունը:
Ցենզուրա մտցնելու համար ֆորմալ առիթ է հանդիսացել երգերի բովանդակության «կարգավորումն ու օրինականացումը», որոնք տեղադրված են համացանցի չինական հատվածում: Ցուցակում մասնավորապես հայտնվել են Լեդի Գագայի նոր` Born This Way ալբոմի The Edge of Glory, Hair, Marry the Night և Bloody Mary երգերը: Այս երգերը արգելելու որևէ պատճառ չի նշվում, սակայն, ամենայն հավանականությամբ, դա կապված է նրանցում ազատության թեմաների շոշափման հետ:
Արգելքի տակ են հայնտվել նաև մի շարք ասիացի և տեղի երգիչներ և արվեստի գործիչներ, որոնք բացահայտ կերպով հանդես են գալիս երկրի կարգերի դեմ: Չինաստանի իշխանություններն առաջին անգամ չէ, որ դիմում են նման մեթոդների: 2006 թ. The Rolling Stones խմբի՝ Պեկինում տեղի ունեցող համերգի ժամանակ նրանց խնդրել էին չկատարել Brown Sugar, Honky Tonk Woman, Beast of Burden, Let’s Spend the Night Together և Rough Justice երգերը:
Բացի այդ՝ նման պահվածքի հետևանքով Չինաստանի իշխանությունները վատ հարաբերությունների մեջ են հայտնվել Google ընկերության հետ: Իսկ ԱՄՆ պետդեպարտամենտը Պեկինին մեղադրել է իրավապաշտպանների էլեկտրոնային փոստերի վրա հաքերական հարձակումներ իրականացնելու մեջ:
