Փոխվարչապետ, Ուկրաինայի չվերահսկվող տարածքների վերաինտեգրման հարցերով նախարար Իրինա Վերեշչուկը հայտարարել է, որ Ուկրաինայի անվտանգության ուժերը, որոնք արգելափակված են Մարիուպոլի «Ազովստալ» գործարանի տարածքում, մարդասիրական միջանցքի կարիք չունեն, նրանք մտադիր չեն հանձնվել։
Նա կրկնել է, որ գործարանում կա 1000 խաղաղ բնակիչ և կոչ արել՝ նրանց համար մարդասիրական միջանցք բացել: Ինչպես հինգշաբթի օրը հայտնել է ՌԴ պաշտպանության նախարար Սերգեյ Շոյգուն՝ ՌԴ նախագահ Վլադիմիր Պուտինի հետ հանդիպման ժամանակ, հումանիտար միջանցքներ են նախապատրաստվել խաղաղ բնակիչների համար, որոնք կարող են գտնվել Ազովստալի տարածքում, և հայտարարվել է հրադադարի ռեժիմ, սակայն ոչ ոք չի լքել գործարանի տարածքը։