«Զենքի մատակարարման յուրաքանչյուր ուշացում, յուրաքանչյուր քաղաքական հետաձգում Ռուսաստանին թույլտվություն է՝ խլել ուկրաինացիների կյանքը»,- ասել է Ուկրաինայի նախագահ Վլադիմիր Զելենսկին կիրակի՝ ապրիլի 17-ի տեսաուղերձում։ Նրա խոսքով՝ Կիևը արևմտյան գործընկերներին ուղղված իր խնդրանքների որոշ կետերի վերաբերյալ ակնկալում է պատասխան 53 օր շարունակ՝ ճիշտ այնքան, որքան տևում է Ռուսաստանի պատերազմն Ուկրաինայի դեմ։ «Որոշ պատասխաններ ձևակերպված են այնպես, որ առաքումները կարող են սկսվել միայն մայիսին»,- հավելել է Զելենսկին։
Նա ասել է, որ այժմ ռուսական զորքերը շարունակում են հրթիռակոծել Խարկովը՝ անվանելով դա «գիտակցված ահաբեկչություն»։ Ուկրաինայի նախագահի խոսքով՝ միայն վերջին չորս օրվա ընթացքում քաղաքում վիրավորվել է ավելի քան 100 մարդ, մոտ 20-ը զոհվել է։
«Ուկրաինային ծանր սպառազինության մատակարարումը Գերմանիային պատերազմի մասնակից չի դարձնի, քանի որ Ուկրաինան օրինական պաշտպանական պատերազմ է մղում Ռուսաստանի դեմ». այս մասին ապրիլի 16-ին հայտարարել էր Գերմանիայի արդարադատության նախարար Մարկո Բուշմանը։ Հաջորդ օրը հայտնի դարձավ, որ Գերմանիայի պաշտպանության նախարար Քրիստին Լամբրեխտը հավանություն է տվել ուկրաինական բանակին զենքի հերթական մատակարարմանը։ Խոսքը ԳԴՀ բանակի զինապահեստների 58 զրահափոխադրիչի մասին է։ Այժմ դրանք պատկանում են չեխական ընկերությանը, որը ցանկանում է դրանք վաճառել Ուկրաինային։
