Թուրքական Radikal թերթի փոխանցմամբ՝ Թուրքիան պատրաստվում է Ռամադան ամսի ավարտից հետո Հյուսիսային Իրաքում ցամաքային օպերացիայի, ուր գտնվում են Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) ճամբարները։
Այդ նպատակով Թուրքիան երկրի հարավարևելյան հատվածում գտնվող և Հյուսիսային Իրաքին սահմանամերձ Շըրնաքի նահանգ է ուղարկել 2000 հոգանոց ռազմական զորակազմ։ Դիարբեքիրի 7-րդ կորպուսը ներկայացնող այդ զորակազմը 120 քաղաքացիական միկրոավտոբուսներով ուղարկվել է Շըրնաք։
Սա վերջին տարիներին այդ տարածաշրջանում ամենախոշոր զորաշարժն է։ Ավտոշարասյան առջևից ընթացել է զրահապատ տանկը, իսկ նրա միջնամասում ու վերջում՝ Jammer տիպի ռազմական ավտոմեքենաները։
Հիշեցնենք, որ օգոստոսի կեսերին Թուրքիայի վարչապետ Էրդողանը հայտարարեց, որ դանակն արդեն հասել է ոսկորին, և որ Ռամադանից հետո «խաղաղ գործողությունները» կստանան այլ բնույթ։ Սակայն Հյուսիսային Իրաք ներխուժելու համար Թուրքիան պետք է նախապես դա համաձայնեցնի ԱՄՆ հետ ու ստանա նրա աջակցությունը։
