Երեկ ռուսական Metaratings.ru պարբերականը տեղեկություն էր տարածել, որ Երևանի «Արարատ-Արմենիա» ֆուտբոլային ակումբը մեծ ուրախության կմասնակցի Ռուսաստանի բաց առաջնությանը։ Մեջբերելով «Արարատ-Արմենիայի» գլխավոր տնօրեն Պողոս Գալստյանի խոսքերը վերոնշյալ պարբերականը գրել էր․ «Դա քաղաքական խնդիր է, բայց եթե ռուսները հրավիրեն, ապա ինչու ոչ: Պատրաստ կլինենք տեղափոխվելու ռուսական լիգա։ Տնային խաղերը կանցկացնենք Երևանում: Այդ մրցաշարը կլինի ԽՍՀՄ առաջնության նման: Ամեն դեպքում կարծում եմ, որ բանը դրան չի հասնի, մարդիկ ողջամիտ կգտնվեն: Շուտով ամեն ինչ կավարտվի, պատժամիջոցները կհանեն և ամեն ինչ լավ կլինի: Մեզ համար չկա տարբերություն, բայց նման հարցերը մենք չենք որոշում: Այդուհանդերձ մենք դեմ չենք և ուրախությամբ կընդունենք այդ առաջարկը»։ Այն բանից հետո, երբ ՈւԵՖԱ-ն և ՖԻՖԱ-ն Ռուսաստանի բոլոր հավաքականներին և ակումբներին զրկեցին միջազգային մրցաշարերին մասնակցելու հնարավորությունից շատ է խոսվում այլընտրանքային լիգա ստեղծելու մասին։
Ռուսական կողմը մտադիր է բաց առաջնությանը ներգրավել նախկին ԽՍՀՄ երկրները ներկայացնող թիմերի։ Եվ ահա Պողոս Գալստյանն անդրադառնալով ռուսական լրատվամիջոցի աղմկահարույց հրապարակմանը հայտարարել է, որ իր խոսքերը ուղղակի խաղաթյորրվել են։ «Աղավաղված տեղեկատվություն են հրապարակել: Ինչպե՞ս կարող եմ նման բան ասել: Ինչպե՞ս կարող ենք 10 թիմով մեր Հայաստանի առաջնությունը թողնել և մասնակցել Ռուսաստանի առաջնությանը: Տրամաբանությանը մոտ չէ անգամ: Ի վերջո, դա նաև ֆինանսական մեծ ծախսերի հետ է կապված»,- Armsport.am-ի թղթակցի հետ զրույցում ասել է Գալստյանը: Պողոս Գալստյանի պնդմամբ, խոսք է գնացել նախկին ԽՍՀՄ երկրների չեմպիոնների մասնակցությամբ մրցաշար անցկացնելու մասին. «Ասել եմ, որ եթե նման առաջարկ լինի, կքննարկենք, բայց Ռուսաստանի առաջնության մասին առհասարակ խոսք չի գնացել: Ինչպե՞ս կարող է 10 թիմ գնալ և մասնակցել Ռուսաստանի առաջնությանը: Նման բան հնարավո՞ր է: Ոչ էլ միայն «Արարատ-Արմենիան» կմասնակցի: Անլուրջ խոսակցություն է»,- ։ Ինչ է իրականում տեղի ունենում։ Հիմք ընդունելով Պողոս Գալստյանի վերջին շեշտադրումները կարող ենք փաստել, որ ռուսական կողմը մանիպուլյացիոն եղանակով փորձում է տպավորություն ստեղծել, որ միջազգային լիգա ստեղծելու գաղափարին կողմ է նաև Հայաստանը։ Նշենք, որ «Արարատ-Արմենիան» հայկական հեղինակավոր ակումբներից մեկն է։
«Արարատ-Արմենիայի» սեփականատերը Ռուսաստանում հայտնի գործարար Սամվել Կարապետյանն է։ Այսինքն, ռուսական լրատվամիջոցը թիրախավորել էր այն ակումբը, որն ուղիղ կապ ունի Ռուսաստանի հետ։ Նշենք, որ «Արարատ-Արմենիան» Հայաստանի ընթացիկ առաջնության միանձնյա առաջատարն է և ամռանը ելույթ է ունենալու եվրագավաթների խաղարկությունում։ Ակումբի ղեկավարությունը լուրջ միջոցներ է ներդրել ոչ միայն Հայաստանի առաջնութունում բարձր արդյուքների հասնելու համար։ Միանգամայն տրամաբանական չէր լինի, եթե հայկական ակումբը որոշեր խաղալ իրավական ուժ չունեցող մրցաշարում։ Չնայած դեռևս Ռուսաստանի ֆուտբոլի միությունը պաշտոնական դիրքորոշում չի հայտնել բաց առաջնություն ստեղծելու վերաբերյալ, բայց ակնհայտ է, որ ՈւԵՖԱ-ն դրական վերաբերմունք չի ցուցաբերի։
Ավելին, արտասահմանյան թիմերը որոք համաձայնվեն մասնակցել այդ մրցաշարին ամենայն հավանականությամբ կենթարկվեն պատժամիջոցների։
