Մամուլում տեղեկություն է հայտնվել, որ Իսրայելի արտաքին գործերի նախարար Սաարը «մտադիր է կառավարության քննարկմանը ներկայացնել Հայոց ցեղասպանությունը ճանաչելու հարցը և եթե նման որոշում ընդունվի, հարցը խորհրդարանում կդրվի քվեարկության»։
Որքանո՞վ է հավաստի այս լուրը, պարզ չէ։ Համենայն դեպս, իսրայելական հասանելի լրատվամիջոցները, ինչպես նաև թուրքական և ադրբեջանական մամուլը այդ մասին առայժմ ոչինչ չեն հրապարակայնացրել։ Դա, սակայն, չի խանգարել, որպեսզի հայաստանյան լրատվամիջոցները «մեկնաբանությունների համար» դիմեն Հայաստանի ԱԳՆ-ին։ Ստացվել է իրավիճակին լիովին համարժեք պատասխան: «Ըստ անհրաժեշտության հանդես կգանք մեկնաբանությամբ»։
Իսրայելում մի քանի ամսից ընտրություններ են։ Եվ եթե արտգործնախարար Սաարի նախաձեռնությունը անգամ կոալիցիոն «կառավարության դիրքորոշումն» է, ոչ ոք չի կարող կանխատեսել, թե հոկտեմբերից հետո Երուսաղեմում քաղաքական ինչ դասավորություն է ստեղծվելու։
Իսրայելի կոալիցիոն կառավարության օրակարգում Հայոց ցեղասպանության «ճանաչման հարցը» ինչո՞ւ է հայտնվել։ Այս հարցի պատասխանը, թվում է, բոլորի համար պարզ է: Թուրքիան Նաթանյահուին մեղադրում է Գազայում «ցեղասպանություն գործելու» մեջ, իսրայելա-թուրքական հարաբերությունները լարված են, և Երուսաղեմը «հակակշիռ» է ստեղծում։
«Ժամանակն է, որ պարզունակ մարդիկ հասկանան, Իսրայելը խորապես թքած ունի՝ հայ ժողովրդին պե՞տք է, որ Իսրայելը Ցեղասպանությունը ճանաչի, թե՞ ոչ։ Դա հայերի համար չի արվում։ Եվ եթե անգամ հայերը աղերսեն չճանաչել, բայց Իսրայելին պետք է Էրդողանի վրա ճնշում գործադրել, միևնույն է՝ Ցեղասպանությունը կճանաչվի»,- իրավիճակը և Նաթանյահուի կառավարության մոտիվացիան այսպես է ներկայացրել իսրայելցի հայտնի բլոգեր Ալեքսանդր Լապշինը։
Ասված է նույնիսկ «առանձնահատուկ օժտվածների» համար շատ պարզ և հասկանալի ձևակերպումներով։ Այդուհանդերձ, ամենաէականը պետք է Հայաստանի հանրությունը պետք է հասկանա․ Նաթանյահուն Էրդողանի «վրա ճնշում է գործադրում, որ ի՞նչ անի»։ Գազայի, Պաղեստինի անկախության, Երուսաղեմի «պատմական կարգավիճակի և օսմանյան ժառանգության» հարցերում Էրդողանը դիրքորոշում հազիվ թե փոխի։ Իսկ Հայաստանի հետ հարաբերությունների կարգավորումը «կարող է առկախել»։ Այդ դեպքում իսրայելա-թուրքական «դաշինքը կվերածնվի՞»։
