Կրպակատերերը օգոստոսի 19-ին Երևանի ավագանուն նամակ-գրություն էին ուղարկել կրպակների ապամոնտաժումը կանխելու նպատակով և այսօր ժամը 10.00-ից հերթական անգամ հավաքվել էին քաղաքապետարանի մոտ: Սակայն Երևանի ավագանին այսօր արտահերթ նիստ չգումարեց: Քաղաքապետարանում ընթանում է ընդամենը ամենշաբաթյա գործակարգավարական խորհրդակցությունը:
Ինչպես մեզ հետ զրույցում նշեց կրպակատերերից Աննա Կիրակոսյանը, իրենց պարզապես փոխանցել են, որ ներկա պահին ընդամենը գյուքագրում է իրականացվում, և մինչև սեպտեմբերի 1-ը հաստատ ապամոնտաժվելու է ընդամենը 216 կրպակ, որոնք ժանգոտած են:
Մեր այն հարցին, թե արդեն ապամոնտաժված կրպակների հարցով ի՞նչ նորություններ կան, տիկին Աննան պատասխանեց, որ ներկա պահին պատճառաբանում են, թե ապամոնտաժված կրպակները գործող չեն եղել, այնինչ դրանք մինչև ապամոնտաժվելը գործել են: Ավելին, պատճառաբանել են, որ նրանց գույքագրման ծանուցագիր է ուղարկվել, պարզապես թյուրիմացության հետևանքով այն ապամոնտաժման տեղ է անցել:
Հիշեցնենք, որ ավելի վաղ գույքագրվել են մայրաքաղաքի 3 հազար 395 կրպակներ, որոնցից 1180-ը չաշխատող, լքյալ կրպակներ են, դրանցից 912-ն արդեն այս տարվա ընթացքում ապամոնտաժվել են: Ենթակա են ապամոնտաժման չաշխատող 216 կրպակներ:
