Վլադիմիր Զելենսկին Թվիթերում գրել է Կասիմ-Ժոմարտ Տոկաևի հետ զրույցի մասին։ «Մենք քննարկել ենք անվտանգության բարդ իրավիճակը տարածաշրջանում։ Մենք պայմանավորվել ենք համագործակցել հումանիտար հարցերում։ Մենք կապի մեջ ենք մնում»,- գրել է Զելենսկին։
ՄԱԿ-ի Գլխավոր ասամբլեայի քվեարկությունը ցույց տվեց, որ Մոսկվայի ներխուժումն Ուկրաինա հավանության չի արժանանում նույնիսկ Ռուսաստանի ավանդական դաշնակիցների կողմից։ Ավելին, բոլորը մտածում են, թե պատերազմի այս կամ այն ելքը ինչպես կազդի իրենց երկրի վրա։ Վրաստանը, հետևելով Ուկրաինային, դիմել է ԵՄ անդամակցության համար, Մոլդովան նույնպես խոսում է այդ գործընթացն արագացնելու անհրաժեշտության մասին։ ԱՄՆ պետքարտուղար Բլինկենը զրուցել է Կենտրոնական Ասիայի երկրների ղեկավարների հետ և հայտարարել, որ ԱՄՆ աջակցում է նրանց ինքնիշխանությանն ու տարածքային ամբողջականությանը։ Չինաստանն իր հերթին կրճատել է ռուսական նավթի գնումները և մեծացրել է գնումները Կենտրոնական Ասիայում, միաժամանակ հայտարարել է Կենտրոնասիական երկրների ինքնիշխանությանն աջակցելու մասին։
Ղազախստանի պաշտպանության փոխնախարար Սուլթան Կամալետդինովն ասել է, որ «Ռուսաստանի և Ուկրաինայի միջև հակամարտությունը Ղազախստանի հետ կապ չունի, մենք կողմերից ոչ մեկին չենք աջակցում»։ Լրագրողները նրան հարցրել են, թե արդյոք Ղազախստանի զինված ուժերը կկարողանան ապահովել անվտանգությունը, եթե երկիր գա ուկրաինական սցենարը։
«Իհարկե, այս հարցն անհանգստացնում է բոլորին, հուսով ենք, որ զինված ուժերը, ինչպես երեկ հանդիպմանը վստահեցրեց մեր նախարարը, պատրաստ են կատարել առաջադրված խնդիրները»,- վստահեցրեց Կամալետդինովը։
Կամալետդինովը խոսել է ռազմածովային ուժերի, ՀՕՊ ուժերի համար զրահատեխնիկայի, հրթիռային և հրետանային սպառազինությունների ձեռքբերման և պահեստազորի սպաների զորակոչի մասին։ «190 մարդ, որից 150-ը գնում է Զինված ուժեր, նրանց մեծ մասը բժիշկներ են, կան կապավորներ, ՏՏ տեխնոլոգիաների մասնագետներ և այլք»,- ասել է Կամալետդինովը։
Ղազախստանի նախագահ Տոկաեւը հանձնարարել է արագորեն արդիականացնել երկրի Զինված ուժերը։
