Դեկտեմբերի 5-ին Վանդենիսում տեղի ունեցած ՏԻՄ ընտրությունների արդյունքում «Քաղաքացիական պայմանագիր»-ը ստացավ 13 մանդատ, «Ահարոն Խաչատրյան» դաշինքը՝ 10, «Միասնական Վարդենիս»-ը՝ 4 մանդատ։ «Ահարոն Խաչատրյան» և «Միասնական Վարդենիս» դաշինքները կոալիցիա էին կազմել և իրենց ունեցած 14 մանդատներով համայնքապետ են ընտրել Ահարոն Խաչատրյանին: Ավագանու անդրանիկ նիստը բոյկոտել են ավագանու ՔՊ-ական 13 անդամները:
ՔՊ-ն դիմել էր դատարան և Առաջին ատյանի դատարանը մասամբ բավարարել է Վարդենիսի ավագանու «Քաղաքացիական պայմանագիր» խմբակցության հայցն ու անվավեր է ճանաչել համայնքապետ ընտրելու ավագանու որոշումը։ Եթե մյուս կողմը դատարանի որոշումը չվիճարկի, ու այն ուժի մեջ մտնի, ավագանին քաղաքապետ ընտրելու նոր որոշում պետք է ընդունի։
Նշենք, որ դատարանը իր որոշման հիմքում դրել այն փաստը, որ «Քաղաքացիական պայմանագիր» կուսակցության ավագանու անդամները այդ նիստի մասին իրազեկված չեն եղել։
Այս առնչությամբ «Ահարոն Խաչատրյան» և «Միասնական Վարդենիս» դաշինքների փաստաբան Վարազդատ Հարությունյանը «Առաջին լրատվական»-ի հետ զրույցում նշեց, որ Վերաքննիչ դատարան բողոքարկման ժամկետը չի ավարտվել, դեռ օրինական ուժի մեջ չի մտել դատարանի որոշումը, որ վերաքննիչ բողոք տանեն դատական ակտի դեմ: «Մի քանի օր դեռ ունենք: Այս պահին նոր հանգամանքը չկա, այդ վիճակն է»,-ասաց Վարազդատ Հարությունյանը:
Դատարանի կողմից ՔՊ-ի հարցի մասնակի բավարարումը, փաստաբանի խոսքով, ոչ մեկին ոչ մի բան չտվեց: Նա նաև նշեց.«Մենք կարող ենք հասնել վերաքննիչ բողոքի բավարարման, բեկանվի այդ դատական ակտը, եւ համայնքի ղեկավարի ընտրությունը մնա ուժի մեջ: Մեր ակնկալիքը դա է: Իրավունքի խախտման բան չկա: Ամեն ինչ պարզ է, 13-ը 14-ի դիմաց քվեարկել են: Հիմա ՔՊ-ն իր այս չարաշահում ենթադրող գործողություններով պարալիզացրել է համայնքի կյանքը»,-ասաց նա:
Վարդենիս համայնքի աշխատակազմի ղեկավար Ահարոն Խաչատրյանն էլ «Առաջին լրատվական»-ի հետ զրույցում նշեց, որ այս պահին օդում կախված վիճակ է, բայց դատական նիստի ժամկետը մարտի 5-ին լրանում է:
«Ամսի 5-ից հետո համայնքը արդեն լրիվ կանցնի իր հիմնական աշխատանքին: Մարտի 5-ին դատարանի որոշումը կմտնի ուժի մեջ, մարտի 7-ին նիստ է լինելու, որտեղ ընտրվելու է համայնքապետ, հարցը լուծվելու է միանշանակ»,-հավելեց նա:
Ըստ էության, Վարդենիսի «Ահարոն Խաչատրյան» եւ «Միասնական Վարդենիս» խմբակցությունները վստահ են, որ նորից 14 ձայնով կարող են համայնքապետ ընտրել իրենց թեկնածուին՝ Ահարոն Խաչատրյանին:
