Հայաստանի Ազգային ժողովում իր աշխատանքներն է մեկնարկել 44-օրյա պատերազմի հանգամանքներն ուսումնասիրող ԱԺ քննիչ հանձնաժողովը՝ առանց խորհրդարանական ընդդիմության մասնակցության։ Արցախի խորհրդարանականները կողմ են այս հանձնաժողովի աշխատանքներին ներգրավվել՝ քննարկելու և ճշմարտությունը վեր հանելու, մեղավորներին պատասխանատվության կանչելու համար։
Արցախի նախագահի մամուլի քարտուղար Լուսինե Ավանեսյանը «Առաջին լրատվական»-ի հետ զրույցում նշեց, որ Արցախի նախագահը ողջունում է 44-օրյա պատերազմի հանգամանքներն ուսումնասիրող հանձնաժողովի ստեղծումը և պատրաստ է համագործակցության ցանկացած ձևաչափով, որպեսզի ավելի շատ, ավելի դյուրին դառնա հանձնաժողովի աշխատանքները:
«Բնականաբար, աշխատանքային քննարկման ձև կա համագործակցության առումով, բայց որևէ կերպ խոչընդոտելու հարց չպետք է լինի, այդպիսի հարց ընդհանրապես չպետք է ծագի, մենք պատրաստ ենք համագործակցության»,-ասաց նա:
Հարցին, թե արդյոք Արցախի բոլոր պաշտոնյաները պատրաստ կլինե՞ն գալ, պատասխանել հանձնաժողովի հարցերին, Ավանեսյանը պատասխանեց. «Ես մյուսների փոխարեն պատասխանել չեմ կարող, Արցախի նախագահի դիրքորոշումն այնպիսին է, որ նա համագործակցության պատրաստ է: Եթե հանձնաժողովը հարկ համարի զրուցել նախագահի հետ, բնականաբար, նա էլ կգա»:
44-օրյա պատերազմի հանգամանքներն ուսումնասիրող ԱԺ քննիչ հանձնաժողովի անդամներն էլ իրենց հերթին կարևորում են Արցախի մասնակցությունը քննիչ հանձնաժողովի աշխատանքներին, վստահեցնում են՝ 44-օրյա պատերազմի ժամանակ Արցախում կարևորագույն պաշտոններ զբաղեցնող անձինք նույնպես կհրավիրվեն հանձնաժողովի նիստին։
