Աբովյան փողոցի՝ Բժշկական համալսարանի դիմաց գտնվող անցումի կրպակները վարձակալող առևտրականները երեկ դիմել են Կենտրոնի թաղապետարան, Երևանի քաղաքապետարան, նախագահական նստավայր՝ իմանալու համար արդյո՞ք ճիշտ են այն լուրերը, որ գենտնանցումն աճուրդով վաճառվելու է։
Երեկ նախագահի վերահսկողական ծառայության ղեկավար Հովհաննես Հովսեփյանն ընդունել է անցումում կրպակներ ունեցող մարդկանցից երկուսին։ «Մեր գլխի տակ փափուկ բարձ դրեցին, ասեցին, որ առանց մեզ որևէ որոշում չի ընդունվի»,- ասում է անհատ ձեռներեց Ավետիք Ալավերդյանը և մեզ ցույց տալիս այն նամակը, որ իրենք այսօր առավոտյան ստացել են քաղաքապետարանից ։ Նամակում ասվում է, որ աճուրդը կայանալու է սեպտեմբերի 29-ին։ Գույքի վաճառքի համար առաջարկվող նվազագույն գինը սահմանվել է 98.500.000 դրամ, բացի դա՝ հաղթողը պետք է պարտավորություն ստանձնի՝ կատարել առնվազն 225.500.000 դրամի ներդրում։
«Այսպիսի գումարներ մենք երազում չենք տեսնում»,- ասում է մեր զրուցակիցը և համոզմունք հայտնում, որ աճուրդի նպատակը տարածքը կոնկրետ որևէ մեկի սեփականությունը դարձնելն է ։
Կրպակատերերը տեղեկացնում են, որ ընդամենը մի քանի ամիս առաջ քաղաքապետարանն իրենցից փող է հավաքել՝ 22 միլիոն դրամ՝ անցումը վերանորոգելու համար։
Նրանք կարծում են, որ տարածքը որևէ մեկի սեփականությունը դարձնելու ծրագիրը նոր չէ, պատահական չէ, որ իրենց պայմանագրերը վերջին ժամանակներս թարմացվում էին ավելի հաճախ՝ երեք ամիսը մեկ անգամ։ Այժմ գրեթե բոլոր կրպակատերերի պայմանագրերի ժամկետը լրացել է, իսկ քաղաքապետարանը հրաժարվում է դրանք թարմացնել։
Ավետիք Ալավերդյանի խոսքով՝ իրենց տարիների բիզնեսը կորցնելու հեռանկարը ստիպել է իր ընկերներից շատերին Հայաստանից հեռանալու ուղիներ որոնել։ «Էս ամեն ինչը մի օրում չի ստոեղծվել, 12 տարի է՝ ես էս խանութն ունեմ, արդեն մեր հաճախորդներն ենք ձեռք բերել, հիմա քառասուն տարեկան հասակում հո ամեն ինչ զրոյից չե՞ս սկսի»,- ասում է Ա. Ալավերդյանը։
