Արցախում ձևավորվել է «Արցախի փրկության» շարժում: Հիմնադիր համաժողովը տեղի է ունեցել դեկտեմբերի 27-ին Ստեփանակերտի Շառլ Ազնավուրի անվան մշակույթի կենտրոնի դահլիճում և դրան մասնակցում էին Արցախի հասարակական կազմակերպությունների ներկայացուցիչներ, քաղաքացիներ։
Արցախի Հանրապետությանը պարտադրված մարտահրավերները հաղթահարելու համար վերջին ամիսներին Արցախի ճակատագրով մտահոգ «Հայրենիքի ձայն», «Արցախի կանչ» և «Արցախի ազգային շարժում» նախաձեռնող խմբերին են միացել «Հայ ընտանիք», «Երկխոսության կամուրջ», «Ռազմաճակատային լրագրողների լիգա» ՀԿ-ները, և մի քանի այլ խմբեր։
Շարժման նպատակներն ու խնդիրները բաղկացած են մի քանի կետից․
ա) Համախմբել Արցախի, Հայաստանի և Սփյուռքի՝ Արցախով մտահոգ և համախոհ մարդկանց, ստեղծել պայքարի արդյունավետ միջոցներ։
բ) Հայաստանի Հանրապետության հետ Արցախի հանրապետության վերամիավորման ապահովում։
գ)Նպաստել ազգային-պետական անվտանգության համակարգերի ստեղծմանը և Արցախի բանակի արդիականացմանը։ Ռազմական անվանգության և պատական սահմանների ամրապնդում, ԶՈՒ հզորոցում, ռազմակրթություն և ռազմագիտություն, ռազմական արդյունաբերություն։
դ) Վերականգնել ժողովրդի բարոյահոգեբանական, փոխադարձ սիրո և հարգանքի մթնոլորտ՝ առաջնորդվելով արդարության սկզբունքով։
ե) Նպաստել հավատի և հոգևորի դերի բարձրացմանը՝ ԱՀ Սահմանադրությամբ և օրենքներով վերապահված գործառույթները իրագործելու համար։
«Առաջին լրատվական»-ի հետ զրույցում շարժման մաս կազմող «Հայրենիքի ձայն» ՀԿ ներկայացուցիչ Վալերի Խաչատրյանը նշեց, որ իրենք այս պահին հանդիպումներ են ունենում Ազգային ժողովի խմբակցությունների հետ, փորձում են գտնել համագործակցության ընդհանուր եզրեր ու իրենց առաջադրած խնդիրների լուծումներ․«Առայժմ որոնումների մեջ ենք՝ ինչպե՞ս անել, որ լուծումները գտնվեն։ Քննարկում ենք մեր ծրագրերը և խնդիր ենք դնում՝ կյանքի կոչել մեր ծրագրերը։ Այստեղ իշխանություն, ոչ իշխանություն՝ մեզ համար նշանակություն չունի։ Մեր շարժման մեջ տարբեր բնագավառների, տարբեր կուսակցությունների ներկայացուցիչներ են։ Աշխատում ենք համատեղ ուժերով»,-ներկայացրեց նա։
Մեր զրուցակիցը նաև հավելեց, որ շարժումն առայժմ քաղաքական ուղղվածություն չունի․«Բայց իհարկե վերջում կարող է վերածվել քաղաքականի, որովհետև եթե դու քաղաքականությամբ չես զբաղվում, քաղաքականությունն է քեզնով զբաղվում։ Բայց առայժմ մեր խնդիրը դա չէ, ընդամենը ուզում ենք լուծումներ գտնել։ Կլինի այդ լուծումը՝ մեծ ուրախությամբ կաշխատենք, չի լինի՝ այդ ժամանակ կմտածենք ինչ անել»։
Խոսելով Արցախում սպասվելիք հնարավոր սահմանադրական փոփոխությունների մասին, Խաչատրյանը նշեց․«Կա այսպիսի մի արտահայտություն՝ նայած դանակն ում ձեռքն է։ Դանակով կարող ես հաց էլ կտրել, մարդ էլ սպանել։ Խնդիրը հենց դա է՝ ինչպես է օգտագործվում դանակը՝ որպես հաց կտրելու գործի՞ք, թե՞ որպես մարդ սպանելու գործիք»։
«Արցախի փրկության» շարժմանը միացել է նաև «Արցախի կանչ» նախաձեռնությունը, որի ղեկավար Միքայել Գասպարյանը «Առաջին լրատվական»-ի հետ զրույցում ասաց, որ առայժմ ծրագրային դրույթների մշակման փուլում են, այն ավարտելուց հետո կներկայացնեն իշխանություններին․«Առայժմ նախաձեռնող խումբը սկզբնական աշխատանքներ է տանում, համախմբման պրոցեսն է ընթանում»։
Մեր զրուցակիցն ընդգծեց, որ «Արցախի փրկության» շարժումը բաց է, դրան կարող են անդամագրվել հասարակական կազմակերպություններ, մտավորականներ․ «Մենք բոլորին ընդունում ենք, բաց ենք համագործակցության համար»,-եզրափակեց նա։
