Грузия Online-ի փոխանցմամբ՝ «Միացյալ Վրաստան-դեմոկրատական շարժում» կուսակցության առաջնորդ Նինո Բուրջանաձեն մեկնաբանել է Թբիլիսիի քաղաքային դատարանի որոշումը, որով նրա ամուսին Բադրի Բիցաձեն հեռակա կարգով դատապարտվել է 5.5 տարվա ազատազրկման՝ 1 ամսում այն բողոքարկելու հնարավորությամբ։
Բուրջանաձեն հայտարարել է, որ իրենք այդ դատավճիռը բողոքարկելու են Ստրասբուրգի դատարանում՝ հավելելով, որ, Բիցաձեի գործի հետ մեկտեղ, անպայմանորեն Ստրասբուրգ կուղարկվեն մայիսի 25-26-ը Թբիլիսիի կենտրոնում ընդդիմության ցույցը բռնի ցրելու ժամանակ տուժածների գործերը, որոնք վճռել են պայքարել այդ անարդարության դեմ։
Բուրջանաձեն նաև հայտարարել է, որ չի պատրաստվում դիմել որևէ երկրի՝ քաղաքական ապաստան տրամադրելու խնդրանքով։ Միևնույն ժամանակ՝ նա շարունակում է լռել իր ամուսնու գտնվելու վայրի մասին՝ ընդգծելով, որ ներկայումս նա գտնվում է անվտանգության մեջ։ Նրա խոսքերով՝ Բիցաձեն չի հանձնվի իրավապահ մարմիններին և իր պայքարը կշարունակի Մարդու իրավունքների Եվրոպական դատարանում։
Հիշեցնենք, որ երբ հունիսի սկզբին վրացական դատարանը Բիցաձեին հեռակա կարգով դատապարտեց երկամսյա ազատազրկման՝ մինչև նրա գործի քննման ավարտը, Բուրջանաձեն հայտարարել էր.
«Սաակաշվիլին ցանկանում է պատանդ վերցնել իմ ընտանիքի անդամներին։ Նա քաջ գիտակցում է, որ ես կանգ չեմ առնի և կշարունակեմ իմ պայքարը մինչև վերջ։ Ձերբակալված է Վրաստանի կեսը, և եթե դրան ավելացնենք Բիցաձեին, ապա դա ոչինչ չի փոխի։ Եթե ձերբակալեն իմ ընտանիքի անդամներին, ապա առավել վատ կլինի իրենց համար, քանի որ եթե ես էլ ողջ չլինեմ, ապա ժողովուրդը կմնա և կպայքարի մինչև վերջ»։
Ի դեպ, 2001-2008 թվականներին Բուրջանաձեն եղել է Վրաստանի խորհրդարանի խոսնակը, իսկ 2003-2004 և 2007-2008 թվականներին՝ Վրաստանի նախագահի պաշտոնակատարը։