«Հայաստանի կառավարությունը՝ վարչապետ Տիգրան Սարգսյանի գլխավորությամբ, խոչընդոտում է երկրում հելիոֆիկացիայի զարգացմանը»,- այսօր լրագրողների հետ հանդիպման ժամանակ հայտարարեց հելիոֆիկացիայի ծրագրերի հեղինակ, տեխնիկական գիտությունների դոկտոր Վահան Համազասպյանը:
Նա տեղեկացրեց, որ այլընտրանքային էներգիայի հարցերով զբաղվող գիտահետազոտական ինստիտուտի հետ համատեղ՝ Սպիտակում հելիոսարքաշինական (արեգակնային էներգիայով աշխատող սարքերի) գործարան հիմնելու ծրագիր են մշակել, դիմել են Միխայիլ Գորբաչովի հիմնադրած «Կանաչ խաչ» կազմակերպությանը և ստացել աջակցության համաձայնությունը. «Մենք ֆինանսական խնդիրներ չունենք, բայց կառավարությունը գործարան հիմնելու համար վարչական խոչընդոտներ է ստեղծում, փաստաթղթային ձևակերպումները ձգձգում են»:
Վ.Համազասպյանի խոսքով գործարանի համար պահանջվում է 8 մլն դոլար, շինությունը կա, հարկավոր են միայն սարքավորումներ: Գործարանը կկարողանա օրական արտադրել 1000 միավոր սարքավորում: Դրանք առավել նպատակահարմար է կիրառել գյուղական վայրերում: «Առաջին լրատվական»-ի հարցին, թե ի՞նչ կարժենան այդ սարքավորումները, Վ.Համազասպյանը պատասխանեց, որ 1 կՎտ հզորության սարքավորումը կարժենա 80-120 դոլար, ինչը միջազգային գներից 1 կարգով (մոտ 10 անգամ) ավելի էժան է, իսկ Հայաստանում միջին գյուղացիական տնտեսությունն օգտագործում է մոտ 32 կՎտ հզորություն:
«Այլընտրանքային էներգետիկայի համաշխարհային շուկան գնահատվում է շուրջ 40 մլրդ դոլար: Հայաստանի գերխնդիրն է դրանում գոնե մի փոքր մաս զբաղեցնել: Մեր իշխանությունը շատ վատ է վերաբերվում այս խնդրին և մենք չենք կարողանում ծավալվել»,- ասաց Վ.Համազասպյանը՝ հավելելով, որ ԱԺ են ներկայացրել հելիոֆիկացիայի ծրագիր, որը սակայն չի քննարկվել, իսկ ՀՀ անվտանգության խորհուրդը էներգետիկ ռազմավարության մեջ այլընտրանքային էներգետիկայի վերաբերյալ ոչ մի բառ չի ներառել:
