«Ինձ համար շատ զարմանալի է, որ մի փոքր միջադեպը այսպիսի աղմուկ բարձրացրեց: Հարևաններ էին՝ կենցաղային հարցի շուրջ վիճել են: Ես դա շատ բնական բան եմ համարում: Ինչի՝ եզդին հայի հետ իրավունք չունի՞ վիճել»,- այսօր լրագրողների հետ հանդիպմանն ասաց Աշխարհի եզդիների ազգային միության նախագահ Ազիզ Թամոյանը` մեկնաբանելով Կոտայքի մարզի Զովունի համայնքում օրեր առաջ տեղի ունեցած միջադեպը:
Ըստ Թամոյանի՝ այս հարցը ազգամիջյան հարթության վրա դիտարկելը մեր թշնամիների հրահրած գործն է: Մենք դրանով ուրախացնում ենք քրդերին, ադրբեջանցիներին, թուրքերին, թող իզուր տեղը չուրախանան: Հայերն ու եզդիները եղբայրներ են, ինչպե՞ս են հնարում նման բաներ: Նրա խոսքով՝ թուրքական, ադրբեջանական կայքերը և որոշ հայկական լրատվամիջոցներ այդ կենցաղային հարցի շահարկմամբ փորձում են սեպ խրել հայ-եզդիական դարավոր բարեկամության մեջ:
Նա խորհուրդ տվեց կարճել քրեական գործը, գործին ընթացք չտալ: «Մենք սիրում ենք Հայաստանը , սա մեր հայրենիքն է»,- ասաց Թամոյանն ու պատմեց մի շարք հետաքրքիր դեպքեր հայ-եզդիական բարեկամական հարաբերություններից և անգամ անեկդոտ՝ եզդիների մասին:
