Թուրքական Hürriyet Daily News and Economic Review թերթի փոխանցմամբ՝ սեպտեմբերի 11-ին Աղթամարի Սուրբ Խաչ եկեղեցում տեղի ունենալիք պատարագից առաջ Վանի նահանգապետարանը մեծ նավամատույց է կառուցում։
Այս կապակցությամբ Վանի նահանգապետ Մյունիր Քարալօղլուն նշել է. «Գործող նավամատույցի փոխարեն մենք կառուցում ենք մեծ նավամատույց, որը կհամապատասխանի այցելուների պահանջներին։ Բացի այդ, նախապատրաստական աշխատանքներ են տարվում՝ այցելուներին ավելի լավ սպասարկելու համար։
Նախորդ տարվա պատարագին մասնակցել է ավելի քան 7000 մարդ։ Մենք ակնկալում ենք, որ այս տարի կգերազանցվի այդ ցուցանիշը, այս տարի հայեր կժամանեն նաև Իրանից։ Ընդհանուր առմամբ՝ Վան այցելող զբոսաշրջիկների քանակը սկսում է աճել օգոստոսից։ Բնականաբար, այստեղ ժամանում են ոչ միայն հայեր, այլև՝ աշխարհի տարբեր երկրների զբոսաշրջիկներ։
Մենք դիմել ենք միջազգային կառույցներին և միջոցներ ենք ստացել նահանգի արևելյան հատվածում գտնվող մի շարք եկեղեցիների ու մենաստանների վերանորոգման համար։ Վերականգնվելու է նաև Չարփանակ (Կտուց) կղզում գտնվող հայկական միջնադարյան վանական համալիրը։ Դրա վերանորոգման աշխատանքները կսկսվեն մի քանի ամսից, և ավարտից հետո այն կգործի որպես թանգարան»։
Հիշեցնենք, որ այս տարվա փետրվարի սկզբին թուրքական Zaman թերթը գրել էր, որ Թուրքիայի տրանսպորտի նախարարությունը հավանության է արժանացրել Վանա լճում նավամատույց կառուցելու գաղափարը: Այն ժամանակ Մյունիր Քարաօղլուն նշել էր.
«Վանա լիճը կարևոր զբոսաշրջային նշանակություն ունի: Այստեղ կան կղզիներ, որոնց վրա զբոսաշրջիկներին գրավող կրոնական շինություններ կան: Սակայն այդ կղզիներ հասնելը և դրանք զբոսաշրջիկների համար առավել գրավիչ դարձնելը կպահանջի նաև ժամանակակից ենթակառուցվածքներ։ Նավամատույց կառուցելու համար անհրաժեշտ է մոտ 7 մլն դոլար: Այն ծառայելու է նաև ջրային սպորտաձևերի սիրահարներին»:
