Ըստ ՀՀ օրենքի՝ կարելի է ապամոնտաժել և տեղափոխել միայն այն պատմամշակութային շինությունները, որոնք ենթական են փլուզման։ Դրա վտանգի բացակայության դեպքում, պետք է շենքերը վերանորոգել։ Իսկ Տերյան 11 հասցեում գտնվող Աֆրիկյանների տունը գնած «Դվին հոլդինգը» ոչ միայն չի իրականացրել շենքը փրկելու համար աշխատանքներ, այլև քանդել է տանիքը՝ շենքի փլուզումն արագացնելու և դրա քանդելը արդարացնելու համար։ Այս մասին ահազանգում է «Պետական կարիքների զոհեր» հկ-ի նախագահ Սեդրակ Բաղդասարյանը։
Հկ-ն դիմել է մշակույթի նախարար Հասմիկ Պողոսյանին, սակայն պարզվել է, որ նախարարը տեղյակ չէ, որ Աֆրիկյանների սեփականատերը փոխվել է 2007 թ.։
Պատմամշակութային շենքերի ապամոնտաժում իրականացնելու համար անհրաժեշտ է նաև կառավարության որոշում։ Սակայն մեզանում հաճախ ապամոնտաժում կատարվում է առանց կառավարության որոշման։ Սեդրակ Բաղդասարյանը հիշեցնում է Սպայի տան դեպքը։ Այս կողոթը ապամոնտաժելու մասին որոշումը տեսնելու հկ-ի խնդրանքին կառավարությունը պատասխանել է, թե շենքը գտնվում է իր հոգածության տակ։
Ըստ Սեդրակ Բաղդասարյանի Աֆրիկյանների՝ մինչ այսօր պահպանված երկու տներից մեկը փլման վտանգի տակ է։
Հկ նախագահը փորձում է հասարակության ուշադրությունը հրավիրել այս խնդրին և ամեն ինչ անել շենքը փրկելու համար։
«Միայն այն, որ Աֆրիկյանները ջուր են բերել Երևան, չհաշված այլ բոլոր բարեգործությունները, որ Աֆրիկյանների ընտանիքը կատարել է, բավական է նրանց հիշատակի շենքերը պահպանելու համար»,- ասում է Սեդրակ Բաղդասարյանը։
