Հայ ազգհային Կոնգրեսի ներկայացուցիչ Վլադիմիր Կարապետյանը «Առաջին լրատվականի» հետ զրույցում մեկնաբանելով Կոնգրեսի հետ երկխոսելու նպատակով ստեղծված իշխանական պատվիրակության Հանրապետական անդամ Գագիկ Մինասյանի երեկվա ասուլիսում հնչեցրած այն մեկնաբանությունները, թե օգոստոսի 9-ին ՀԱԿ պատվիրակության անդամների հետ կայացած հանդիպման ընթացքում Կոնգրեսի կալանավորված ակտիվիստներին ազատ արձակելու հարցը չի քննարկվել, նշեց. «Սա ասում է երկար տարիներ պատգամավորական մանդատ ունեցող մեկը, այն պարագայում, երբ նույն օրը հրապարակվել էր Կոնգրես-իշխանություն պատվիրակությունների համատեղ հայտարարությունը, որում նշված է, որ հանդիպմանը բացառապես քննարկվել է «օգոստոսի 9-ին ՀԱԿ-ի ակտիվիստների և ոստիկանությանն աշխատակիցների միջև տեղի ունեցած միջադեպը»:
Բացի նրանից, որ փորձառու պատգամավոր և ՀՀ ԱԺ հանձնաժողովի նախագահն էլ լրացրեց ՀՀԿ ստախոսների շարքը և այսուհետ իր հետ շփման ժամանակ պետք է նկատի ունենալ, որ նա ազնիվ մարդ չէ` առանց աչքը թարթելու կարող է ապատեղեկատվություն տարածել, Գ. Մինասյանը նաև խախտել է օգոստոսի 16-ին ձեռք բերված պայմանավորվածությունը, համաձայն որի բանակցող կողմերը «ձեռնպահ են մնալու մանրամասների վերաբերյալ մեկնաբանություն տալուց»: Հիմա, եթե կողմերից մեկը, հարգելով պայմանավորվածությունը, չի նշում թե ինչ պահանջներ է առաջ քաշել հանդիպմանը, ինչպե՞ս հասկանալ Ս. Սարգսյանի լիազորություններով օժտված պատգամավորի մեկնաբանությունները, այն էլ ծայրից ծայր մտացածին»:
Կարապետյանը նշեց, որ այդ ամենը ապակառուցողական կեցվածք է, որը ցույց է տալիս, որ իշխանության պատվիրակության ներկայացուցիչները, ոչ միայն չեն հարգում պայմանավորվածությունները, այլև ունեն համապատասխան արժեքներ` լինելով հրապարակային գործիչներ չեն խորշում նույնիսկ հրապարակային ստել:
