Եվրախորհրդի կտտանքների կանխարգելման կոմիտեն հայտարարում է, որ Հայաստանում ոստիկանության կողմից ազատազրկվածների նկատմամբ վերաբերմունքը շարունակում է լուրջ խնդիր մնալ:
Հայաստանի կառավարությունն արդեն արձագանքել է այս զեկույցին և նշել, թե ինչ քայլեր է կատարել՝ նշված թերությունները շտկելու համար: Արդարադատության նախարարության պատասխանում, փաստաթղթի համաձայն՝ մասնավորապես ասվում է, որ իրականացվել են մի շարք օրենսդրական, նորմատիվ բարեփոխումներ, բացի այդ՝ 2010 թվականին 105 ոստիկան ենթարկվել է կարգապահական տույժի, 74-ի դեմ քրեական գործ է հարուցվել, 15-ը դատապարտվել են:
Զեկույցի և ՀՀ կառավարության արձագանքի շուրջ զրուցեցինք Հելսինկյան ասոցիացիայի նախագահ, իրավապաշտպան Միքայել Դանիելյանի հետ, ով ասաց, որ ինքը տեղյակ է զեկույցից, ավելին՝ ստացել է նամակ՝ կոմիտեի անդամներից, որոնք Հայաստանում անձամբ իր հետ հանդիպել են: «Զեկույցը միանշանակ իր վատ դերը կխաղա: Ավելին ազդեցությունը միանգամից չի ստացվում: Ժամանակ առ ժամանակ, երբ հավաքվում են դոնորները և որոշում, թե ինչ օգնություն պետք է տրամադրվի այս կամ այն երկրին, քննարկվում է նաև այդտեղ մարդու իրավունքների վիճակը, և, եթե վիճակը լավ չի լինում, խորհուրդ է տրվում չտրամադրել օգնություն»,- ահազանգեց Մ. Դանիելյանը:
Ինչ վերաբերում է մեր կառավարության պատասխանին, նա նշեց, որ մեր իշխանության համար սովորական երևույթ է դարձել նման պատասխաններ տալը: Ավելին ՝ առաջին զեկույցը չէ, երբ Հայաստանի իշխանություններին ասում են, որ վիճակը շատ վատ է, իսկ մերոնք ասում են՝ չէ, ամեն ինչ կարվի, մենք պատրաստ ենք: «Բայց երևույթը շարունակվում է, ինչի ադյունքում հերթական նմանատիպ զեկույցներ ենք ստանում»,- ավելացրեց Միքայել Դանիելյանը:
