Ադրբեջանը կիրակի օրը Հայաստանին Եվրամիության միջնորդությամբ փոխանցել է 10 հայ զինծառայողների։ Նրանք գերեվարվել էին նոյեմբերի 16-ին երկու երկրների սահմանին տեղի ունեցած բախումների ժամանակ: ՏԱՍՍ-ի փոխանցմամբ՝ այս մասին հայտնել է ռազմագերիների, պատանդների և անհայտ կորածների հարցերով զբաղվող պետական հանձնաժողովը։
«Որպես մարդասիրության սկզբունքներին հավատարմության դրսևորում՝ Ադրբեջանի Հանրապետությունը Եվրոպական միության միջնորդությամբ դեկտեմբերի 19-ին Հայաստանին է հանձնել 10 հայ զինծառայողների», – ասված է հաղորդագրության մեջ:
Հիշեցնենք, որ դեկտեմբերի 15-ին Բրյուսելում կայացել էր Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպումը։ Տեղի էր ունեցել նաև Նիկոլ Փաշինյանի, Ֆրանսիայի նախագահ Էմանուել Մակրոնի ու Իլհամ Ալիևի եռակողմ հանդիպումը։
Հիշեցնենք, որ դեկտեմբերի 4-ին Հայաստան էին վերադարձել նոյեմբերի 16-ին գերեվարված ևս 10 զինծառայողներ։