Քաղաքագետ Ալեքսանդր Իսկանդարյանի կարծիքով՝ արտաքին քաղաքականության բնագավառում փոփոխություններ կատարվում են ոչ թե հենց Հայաստանի հետ կապված, այլ Հայաստանի շուրջ, որոնք կարող են իրենց ուղղակի ազդեցությունը ունենալ Հայաստանի վրա:
Մասնավորապես, ըստ Իսկանդարյանի, մեզ համար կարևոր են Սիրիայում կատարվող դեպքերը, որոնք ուղղակի կապված են Թուրքիայի, Իրաքի և քրդերի հետ, և Սիրիայում կատարվելիքը կարող է ազդել Հայաստանի վրա. «Ակնհայտ է, որ Թուրքիան մտահոգված է Սիրիայում կատարվելիք դեպքերով, քանզի այնտեղ լուրջ իրադարձություններ են տեղի ունենում, որոնք կարող են փոխել տարածաշրջանի նկարագիրը, ինչն էլ անկասկած անդրադարձ կունենա Հայաստանի վրա»:
Արտաքին քաղաքականության բնագավառում կատարվող հետաքրքիր զարգացումներից Իսկանդարյանն առանձնացրեց Ադրբեջանի նախագահ Իլհամ Ալիևի և ԱՊՀ-ի միջև առաջացած լարվածությունը. «Կազանյան հանդիպումից հետո ակնհայտ է, որ կա լարվածություն և դա դրսևորվեց Ադրբեջանի նամակով՝ ուղղված ՄԱԿ-ին Հայաստանի հետ կապված և դրան հետևած Հայաստանի պատասխանը, ինչը ցույց է տալիս Ադրբեջանի լուրջ գրգռվածությունը ստեղծված իրավիճակի հետ կապված»:
Իսկանդարյանը նաև առանձնացրեց այն հանգամանքը, որ Ալիևը հրաժարվել է մասնակցել առաջիկայում Դուշանբեում կայանալիք ԱՊՀ հոբելյանական գագաթնաժողովին: Քաղաքագետի խոսքերով՝ հաճախ է լինում, որ ԱՊՀ երկրների ոչ բոլոր ղեկավարներն են ներկայանում գագաթնաժողովներին, սակայն ներկա պարագայում, ըստ Իսկանդարյանի, Ալիևի քայլը կարելի է համարել ադրբեջանական կողմի դեմարշ։
«Այդ դեմարշը կապված է նրա հետ, որ ղարաբաղյան հարցում նվազագույնը 1-2 տարվա ընթացքում ակտիվություն չի արձանագրվի, քանզի կոնֆլիկտի մասնակից բոլոր երկրներում ընտրություններ են, և բոլորը կենտրոնանալու են իրենց ներքին խնդիրների վրա, ինչպես նաև Մերձավոր Արևելքում կատարվող դեպքերը շեղում են մեծ տերություններին այն ամենից, ինչ կատարվում է ԼՂ հարցի շուրջ: Թերևս այդ ամենը որոշակի լարվածություն է առաջացնում Ադրբեջանում, և դա դրսևորվում է նմանատիպ դեմարշով»:
