ՀՀ փոխվարչապետ, «Լինսի» հիմնադրամի կառավարման խորհրդի նախագահ Արմեն Գևորգյանի մոտ այսօր տեղի ունեցած խորհրդակցությանը քննարկվեց «Լինսի» հիմնադրամի «Դպրոցաշինություն» ծրագրի ընթացքը: ԾԻԳ-ի տնօրեն Հրայր Սարգսյանը զեկուցեց, որ ծրագրում ընդգրկված բոլոր 6 դպրոցներում շինարարական աշխատանքները մոտենում են ավարտին: Ըստ նրա` ամեն ինչ արվում է նաև խնայված միջոցների հաշվին իրականացվող մասնաշենքերի վերանորոգումն ավարտելու համար, որպեսզի նոր ուսումնական տարին աշակերտները դիմավորեն ամբողջությամբ հիմնանորոգված դպրոցներում:
Փոխվարչապետը, ընդհանուր առմամբ, բավարար գնահատելով աշխատանքների ընթացքը` հորդորեց ուշադրություն դարձնել դրանց որակին` հիշեցնելով, որ ծրագիրն ունի մեկ տարվա հետերաշխիքային ժամկետ:
Նշենք, որ ՀՀ կառավարության և «Լինսի» հիմնադրամի միջև կնքված Վերաձևակերպված երկրորդ փոխըմբռնման հուշագրով հիմնադրամի ծրագիրը շարունակվում է «Դպրոցաշինության» բաղադրիչով և ընդգրկում է Շիրակի մարզի Սարակապ, Նոր Կյանք ու Արևշատ գյուղերի և Լոռու մարզի Սպիտակ քաղաքի թիվ 1, Ստեփանավանի թիվ 6 ու Վանաձորի թիվ 22 դպրոցները: Այս մարզերն ընտրվել էին Սպիտակի երկրաշարժի 20-րդ տարելիցի կապակցությամբ: Ծրագրի ընդհանուր արժեքը 12 մլն դոլար է:
