«Առաջին լրատվական»-ի զրուցակիցն է Արցախի արտաքին գործերի նախարար Դավիթ Բաբայանը։
–Պարոն Բաբայան, ԵԱՀԿ Մինսկի խմբի համանախագահները մտահոգություն են հայտնել հայ–ադրբեջանական սահմանին տեղի ունեցած միջադեպերի առնչությամբ։ Նաև կողմերին կոչ են արել կոնկրետ քայլեր ձեռնարկել իրավիճակի անհապաղ դեէսկալացիայի համար, ձեռնպահ մնալ սադրիչ հռետորաբանությունից։ Ինչպե՞ս եք գնահատում այս հայտարարությունն, որն , ըստ էության նորից անհասցե է և հավասարության նշան դնող։
–Իհարկե շատ ճիշտ ու լավ կլիներ, որպեսզի կոչերը հասցեական հնչեցին, քանի որ բոլորի համար պարզ է, որ այդ իրավիճակը բարդեցումն ու նման միջադեպերի մեղավորն Ադրբեջանն է։ Բայց հասկանալով, որ առանց այն էլ բանակցային գործընթացի հետ կապված կան խնդիրներ ու խոչընդոտներ, Ադրբեջանն ագրեսիվ ու հիստերիկ պահվածք է ցուցաբերում, պարզ է, որ համանախագահները չեն ուզում էլ ավելի բարդեցնել իրավիճակը։ Բայց այնուամենայնիվ ճիշտ կլիներ, որ հասցեական կոչեր հնչեցին՝ չնայած այս իրավիճակում նույնիսկ այս ընդհանրական մոտեցումը կարելի է գնահատել որպես շահագրգռվածություն ՝ իրավիճակի կայուն ու խաղաղ պահպանման հարցում։
-ՀՀ արտգործնախարար Արարատ Միրզոյանը ԱլԳ արտաքին գործերի նախարարների հետ հանդիպմանը նշել է, որ երկու կողմերին ուղղված անհասցե կոչերն այն պարագայում, երբ Հայաստանը վստահելի քայլեր է անում խաղաղության հաստատման ուղղությամբ, իսկ Ադրբեջանը շարունակում է իրավիճակի էսկալացիան, կարող է ընկալվել որպես մեր միջազգային գործընկերների կողմից անտարբերություն և հանձնառության բացակայություն։ Կիսու՞մ եք այս մոտեցումը։
–Ես կասեի ավելի շուտ չափազանց զգուշություն։ Կրկնում եմ՝ հաշվի առնելով Ադրբեջանի հիստերիկ պահվածքը, հաշվի առնելով այն հրամայականները, որ այսօր ծառացած են մեր առջև՝ այսօր փաստորեն Ադրբեջանը շատ անհարմար դրության մեջ է դնում նաև ԵԱՀԿ Մինսկի խմբի համանախագահությանը։ Այնուամենայնիվ սպասենք ու տեսնենք, թե իրավիճակն ինչպես է զարգանալու։ Այս իրավիճակում՝ չնայած մենք իհարկե շատ ավելի շահագրգռված ենք, որ լինեն հասցեական կոչեր, հասցեական գնահատականներ, բայց նույնիսկ այսպես՝ ցույց է տրվում, որ կա շահագրգռվածություն կայունության ու խաղաղության ամրապնդման հարցում։ Հասկանալի է, որ համանախագահները ևս չեն ընդունում Ադրբեջանի կողմից նման պահվածքները։ Գիտեք հայտնի միջադեպերը տրակտորիստի հետ կապված, երիտասարդ տղայի սպանությունը․ եղել է համապատասխան հայտարարություն նաև Ռուսաստանի Դաշնության կողմից, որտեղ հստակ նշված է եղել, որ դա կատարել է Ադրբեջանը։ Մինսկի խմբի եռանախագահությունն անուղղակիորեն, բայց գնահատական տալիս է։ Սպասենք՝ տեսնենք մյուս զարգացումներին։
-Տարիները ցույց տվեցին, սակայն, որ անհասցե հայտարարությունները, կոչերն ու դատապարտումները Ադրբեջանին որևէ կերպ չեն զսպում։
-Ինչ-որ տեղ զսպում են, ինչ-որ տեղ՝ ոչ։ Ժամանակ է հարկավոր ու ճիշտ աշխատանք։
