Ամերիկայի Հայ դատի հանձնախմբի (ANCA) կայքի փոխանցմամբ՝ ԱՄՆ հայ համայնքը Թուրքիայում ԱՄՆ դեսպան Ֆրենսիս Ռիկիարդոնեից պահանջել է անհապաղ ներողություն խնդրել։ Դրա պատճառն այն է, որ Ռիկիարդոնեն սենատոր Ռոբերտ Մենենդեսին ուղարկած իր գրավոր պատասխանում նշել էր, որ 1915 թվականին ժամանակակից Թուրքիայի տարածքում գործող հայկական եկեղեցիների մեծ մասը գործում է նաև ներկայումս։
Հիշեցնենք, որ այդ կապակցությամբ ANCA-ի գործադիր տնօրեն Արամ Համբարյանը հայտարարել էր, որ դրանով Ռիկիարդոնեն միտումնավոր խեղաթյուրել է պատմական փաստերը, որպեսզի համապատասխանի Հայոց ցեղասպանության հարցում Անկարայի ժխտողական քաղաքականությանը։ Համբարյանը հավելել էր, որ Ռիկիարդոնեն ակնհայտորեն ի վիճակի չէ Թուրքիայում արդյունավետորեն պաշտպանել ամերիկյան շահերը կամ արժեքները։
Պատմական գրառումները ցույց են տալիս, որ 1915 թվականին ժամանակակից Թուրքիայի տարածքում գործել են ավելի քան 2000 եկեղեցիներ, մինչդեռ այժմ այդտեղ գործող եկեղեցիների քանակը չի հասնում 50-ի։