Երևանի 2022թ. բյուջեի, համայնքում տեղական տուրքերի ու վճարների դրույքաչափերի, դրանց արտոնությունների, ինչպես նաև Երևանի զարգացման 2022 թվականի ծրագրի մասին ավագանու որոշման նախագծերը ներկայացվել են հանրային քննարկման:
Որոշումը միաձայն ընդունվել է Երևանի քաղաքապետին կից քաղաքային համայնքի զարգացման հնգամյա ծրագրի և տարեկան բյուջեի կառավարման խորհրդի անդամների կողմից: Նախքան այդ, նրանք իրենց հարցերն ու առաջարկներն են ուղղել քաղաքային տնտեսության մի շարք ոլորտներում բարեփոխումների վերաբերյալ:
Նիստը վարող քաղաքապետի տեղակալ Սերգեյ Ներսեսյանը, պատասխանելով խորհրդի անդամների հարցերին, նշել է, որ այն խնդիրները, որոնց կարգավորումը քաղաքապետարանի իրավասության շրջանակում է կդիտարկվեն և կներառվեն հետագա ծրագրերում:
Անդրադարձ կատարվեց նաև Արզումանյան 10 և 17 հասցեների վթարային շենքերին։ Բնակիչների հարցերին ի պատասխան շինարարության և բարեկարգման վարչության պետ Գրիգոր Հարությունյանը նշեց, որ շենքերը չեն բարեկարգվել, քանի որ եղել են բնակիչներ, ովքեր դեմ են եղել իրենց բնակարանները լքելուն։
«Դա Երևան քաղաքի պարտականությունը չէ, դա մեր բարի կամքի դրսևորումն է: Հասկանալով, որ այդ խնդիրները կյանքի համար վտանգ կարող են ներկայացնել՝ ուզում ենք դրանք մաքսիմալ արագ լուծել»,- ավելացրել է Սերգեյ Ներսեսյանը։
Նշվել է նաև, որ զարգացման ծրագրով և բյուջեով առաջնահերթ ուղղություններն են մանկապարտեզների, առողջապահական հիմնարկների նորոգումն ու վերակառուցումը, վերելակների փոխարինումը, տրանսպորտային համակարգի բարեփոխումները, բակերի և հանգստի գոտիների վերականգնումն ու ստեղծումը, ջրահեռացման համակարգերի փոխարինումը, ճանապարհաշինությունն ու փողոցների բարեկարգումը:
