Վերջին շրջանում էստոնական և արևմտյան մամուլում հայտնված հրապարակումներից պարզ է դառնում, որ Էստոնիայի պաշտպանության նախարարության վրա հարձակում գործած հայազգի Կարեն Դրամբյանը մեծ հեղինակություն ուներ տեղի ռուսալեզու բնակչության շրջանում: Ինչպես հայտնում է «Ազատություն» ռադիոկայանը, Դրամբյանը 2007 թ. դատարանում, որպես փաստաբան, ներկայացրել է այն ռուս երիտասարդների շահերը, ովքեր ձերբակալվել էին ոստիկանների հետ բախումների ընթացքում: Չորս տարի առաջ անկարգությունների և ռուս բնակչության բողոքի պատճառը Հայրենական Մեծ պատերազմի զոհերի հիշատակին նվիրված արձանի ապամոնտաժման մասին Էստոնիայի իշխանությունների որոշումն էր:
Էստոնական մամուլում խոսվում է այն մասին, որ Դրամբյանի իրական թիրախը երկրի պաշտպանության նախարար Մարտ Լաարն է եղել, ում հաճախ անվանում են էստոնական ազգայնականության գաղափարախոս: Նա Washington Times պարբերականին տված հարցազրույցում նշել է, որ Կարեն Դրամբյանը ռուսական հզոր քարոզչության ազդեցության տակ էր:
Դրամբյանի տանը խուզարկության ժամանակ հայտնաբերվել է մի ձեռագիր, որտեղ վերջինս խոսում է Էստոնիայի ազգայնականության մասին: Լրագրողներն այն արդեն անվանել են «Դրամբյանի մանիֆեստ»` զուգահեռներ անցկացնելով նորվեգացի մարդասպան Բրեյվիկի հետ: Դրամբյանը գրում է, որ եթե Էստոնիայի իշխանությունները շարունակեն ազգային փոքրամասնությունների դեմ ազգայնական քաղաքականությունը, ապա այն կբերի հանցավորության աճի:
2007 թ. Դրամբյանից հարցազրույց վերցրած վրացի լրագրող Թենգո Գոգոտաշվիլին հայտարարել է, թե Էստոնիայի անկախության գաղափարը խորթ էր անհաջողակ ահաբեկչին:
Վրացի լրագրողը նշել է. «Դրամբյանն այն սերնդի ներկայացուցիչներից էր, ով այդպես էլ չկարողացավ համակերպվել Խորհրդային Միության փլուզման հետ: Նրա ուզածը բազմամշակութային Էստոնիան էր, այլ ոչ թե պետություն միայն Էստոնացիների համար: Փաստորեն նրա ցանկությունն Էստոնիայի Խորհրդային Սոցիալիստական Հանրապետության վերադարձն էր»:
Հիշեցնենք, որ օգոստոսի 11-ին, տեղական ժամանակով մոտավորապես 15:30-ին Կարեն Դրամբյանը հարձակում էր գործել Էստոնիայի պաշտպանության նախարարության վարչական շենքի վրա, կրակ բացել շենքում, որից հետո զոհվել էր ոստիկանության կողմից նրան վնասազերծելուն ուղղված գործողության ժամանակ:
