Աստանայի հանդիպումն այնքան էլ արդյունավետ չի եղել Ղարաբաղի համար: Փաստը, որ նախագահներն առանձին հանդիպում կարծես չեն էլ ունեցել, վկայում է այն մասին որ Ալիև-Մեդվեդև հանդիպումն այնքան էլ դրական չի եղել:
Այս մասին լրագրողների հետ հանդիպմանը ասաց ՀՅԴ Հայ դատի և քաղաքական հարցերի պատասխանատու Կիրո Մանոյանը` խոսելով ղարաբաղյան հարցի շուրջ ներկայում ձևավորված վիճակի մասին: Նրա կարծիքով՝ մինչև տարեվերջ ղարաբաղյան հարցի շուրջ ընթացող բանակցություններից որևէ դրական ակնկալիք պետք չէ ունենալ, քանի որ չկա լավատեսական միտք:
Ադրբեջանի դիրքորոշումը չի փոխվել, թեև ՌԴ նախագահ Մեդվեդևը շահագրգռված է հարցի դրական լուծմամաբ, բայց «չի երևում որ դրական կեցվածք կա»: «Մինչև հիմա այդքան էլ պարզ չէ, թե Մեդվեդևն ինչ ուղերձ է հղել Հայաստանի և Ադրբեջանի նախագահներին»,- ասաց Կիրո Մանոյանը՝ նշելով, որ Մեդվեդևի ուղերձն, ամենայն հավանականութամբ, չէր կարող տարբեր լինել ԵԱՀԿ Մինսկի խմբի համանախագահող երկրների դիրքորոշումներից:
«Մեկ բան պարզ է, որ Ադրբեջանի ժխտողական կեցվածքն է գլխավոր խոչընդոտը բանակցությունների արդյունավետ լինելուն»,- ասաց Մանոյանը: Նրա կարծիքով՝ եթե մինչև տարեվերջ դրական արդյունք չլինի, ապա հաշվի առնելով Ռուսաստանում կայանալիք նախագահական ընտրությունները, բանակցությունները, ամենայն հավանականությամբ, կսառեցվեն: Ինչ վերաբերում է Ադրբեջանի կողմից պատերազմ սկսելուն, ապա նա նշեց, որ եթե Ադրբեջանը վստահ լինի, որ կհաղթի պատերազմում՝ կսկսի, թեև ներկայում պատերազմի հավանականությունը մեծ չէ:
Կիրո Մանոյանը կոչ արեց հայ դիվանագիտությանը՝ աշխարհին հիշեցնել ղարաբաղյան հարցի բուն էությունը, քանի որ 20 տարում ձևավորված քաղաքական նոր շրջանակներն այնքան էլ տեղյակ չեն հարցի էությունից: Նա հայ դիվանագիտության ձախողում համարեց այն, որ ներկայում ԱՄՆ-ը և Եվրոպան Ղարաբաղի հարցը դիտարկում են Հայաստանի և Թուրքիայի հետ հարաբերությունների շրջանակներում: