Չինաստանի հյուսիսային Շանսի նահանգում տևական հորդառատ անձրևների և ջրհեղեղի հետևանքով զոհվել է առնվազն 15 մարդ, 3-ն անհետ կորած են համարվում։ Տարհանվել է ավելի քան 120 հազար մարդ։ Այս մասին ասուլիսի ժամանակ հայտարարել է նահանգի արտակարգ իրավիճակների հարցերով վարչության ղեկավար Վան Ցիժույը, փոխանցում է RIA Novosti-ն։
Նահանգի 11 քաղաքներում և 76 ավաններում ավելի քան 1․7 մլն մարդ հայտնվել է աղետի գոտում։ Ավերվել է ավելի քան 19․5 հազար շինություն, վնասվել՝ 18․2 հազարը։ Անմիջական տնտեսական վնասը գնահատվում է 5․03 մլրդ յուան (մոտ 780 մլն դոլար)։
Հոկտեմբերի 2-7-ը նահանգում գրանցվել են օդերևութաբանական դիտարկումերի ողջ պատմության ընթացքում աշնանային ամենաառատ տեղումները։
Ավելի վաղ Ֆինանսների և Արտակարգ իրավիճակների նախարարություններն ավելի քան 12․4 մլն դոլար էին հատկացրել աղետի հետևանքների վերացման համար։