Ադրբեջանական Trend լրատվական գործակալության փոխանցմամբ՝ թուրք-ասիական հետազոտությունների կենտրոնի (TASAM)փորձագետ Հիլմի Օզևն անդրադարձել է տարածաշրջանում թուրք-իրանական մրցակցությանը.
«Տարածաշրջանում վերահսկողություն հաստատելու հարցում Թուրքիայի հետ մրցակցող Իրանը փորձում է խոչընդոտել սիրիական ճգնաժամին Թուրքիայի միջամտությանը։ Իրանն այս հարցում կարող է օգտագործել քուրդ անջատողականներին՝ որպես Թուրքիայի վրա ճնշման լծակ։
Գաղտնիք չէ, որ Իրանը չի ցանկանում, որպեսզի Թուրքիան միջնորդի դեր ստանձնի սիրիական ճգնաժամի կարգավորման գործընթացում։ Դրա համար էլ Թուրքիայում ահաբեկչական հռչակված ու արգելված «Քրդստանի աշխատավորական կուսակցությանը» (PKK) առնչվող ցանկացած գործոն, որը կարող է իր ազդեցությունն ունենալ Թուրքիայի վրա, Թեհրանի համար հանդիսանում է Անկարայի սիրիական միջամտությունը կանխելու հաղթաթուղթ։
Քրդական գործոնի օգտագործման շնորհիվ Թեհրանը կարող է կանխել Թուրքիայի միջամտությունը սիրիական ճգնաժամին, կամ էլ ընդհակառակը՝ ստիպել Անկարային այդ ամենն անել իր պլանի համաձայն։ Իրանն աջակցում է Սիրիայի նախագահ Ասադի ռեժիմին և այդ հարցում նա դաշնակիցներ չունի։ Իրանի համար մեծ հաջողություն կլինի այդ հարցում Թուրքիայի նման կարևոր դաշնակցի ձեռք բերումը։
Սիրիայի վերաբերյալ թուրքական իշխանությունների վերջին հայտարարություններն ակնհայտորեն վկայում են այն մասին, որ Թուրքիան պատրաստվում է միջամտել ճգնաժամի կարգավորմանը։ Դա անհանգստացրել է Իրանին՝ ստիպելով նրան Սիրիայի նախագահ Ասադին աջակցելու ուղիներ որոնել։
Օզևը կարծում է, որ իրանական հատուկ ծառայությունների կողմից PKK-ի երկրորդ դեմքի՝ Մուրադ Քարայըլանի ձերբակալությունը (ինչը, սակայն, հետագայում հերքվեց իրանական իշխանությունների կողմից) Իրանին հնարավորություն է ընձեռում՝ սիրիական ճգնաժամի հարցով Թուրքիայի հետ բանակցություններ վարելու համար, որոնցում Իրանը կթելադրի խաղի կանոնները։
Քարայըլանի հնարավոր ձերբակալությունն Իրանին դնում է շահեկան վիճակում, ինչի շնորհիվ նա կարող է հույսեր կապել Սիրիայի հարցում Թուրքիայի հետ համագործակցելու հետ»։
Հիշեցնենք, որ PKK-ն հիմնադրվել է 1978 թվականին՝ քուրդ առաջնորդ Աբդուլլահ Օջալանի կողմից։ Քարայըլանը PKK-ին միացել է 1979 թվականին և 1999 թվականին Օջալանի ձերբակալումից հետո դարձել է նրա փաստացի ղեկավարը։
