Լուսանկարը՝ SputnikArmenia-ի
Հայտնի գործարար Տիգրան Արզաքանցյանը, որը ԱԺ արտահերթ ընտրություններում հանդես էր գալիս որպես Հայաստանի դեմոկրատական կուսակցության (ՀԴԿ) վարչապետի թեկնածու, հեռացել է ՀԴԿ-ից: Նա նշել է, որ որոշակի տարաձայնություններ է ունեցել ՀԴԿ ղեկավար Արամ Գ. Սարգսյանի հետ:
Այս առնչությամբ Արամ Գ. Սարգսյանն «Առաջին լրատվական»-ի հետ զրույցում նշեց. «Նախ ասեմ, որ անհեթեթությունները մեկնաբանելն իմ սովորությունը չէ, բայց եթե պարոնը որոշել է հանդես գալ այդպիսի ելույթով, ստիպված եմ մեկնաբանել: Մենք ընտրություններից հետո երկուսով հանդիպել ենք և պայմանավորվել ենք, որ իր ճանապարհն ուրիշ է, մերը՝ ուրիշ, որ բաժանվում ենք որպես բարյացկամ վերաբերմունք ունեցող անձինք: Ինքն ընդհանրապես, ընտրություններից հետո կապը կուսակցության հետ լրիվ կտրած է եղել: Մենք չէինք հեռացնում նրան, որպեսզի ավելի հանդարտ ձևով դա տեղի ունենա:
Ես հանկարծակիի եկա այն պահից, երբ որ պարզվեց, որ երեք ամիս արդեն անցել է, և նա հանդես է գալիս ասուլիսով, հայտարարություններով: Առավել ևս, որ մենք հայտարարեցինք, որ իր հանդիպումները վարչապետի հետ մեր կուսակցության հետ որևէ կապ չունեն, որովհետև մենք նրան չենք լիազորել նման հանդիպումների մասնակցել: Հետո պարզվեց, որ ինքը չի ասել, որ ներկայացնում է ՀԴԿ-ն, այլ հավանաբար, կազմակերպիչները»,-ասաց Արամ Սարգսյանը:
Հարցին, թե արտախորհրդարանական ուժերի հետ Նիկոլ Փաշինյանի հանդիպմանը Տիգրան Արզաքանցյանը ՀԴԿ-ի անունից չէր հանդես գալի՞ս, նա պատասխանեց. «Մենք էլ ստիպված էինք լինում ամեն անգամ բարոյապես դա հերքել: Որից հետո արդեն նամակով դիմեցին կառավարության աշխատակազմին:
Մենք այդ ձևաչափով քննարկումներին դեմ ենք, որովհետև երբ մենք էինք իրեն դիմում, որ գանք ներկայացնենք այս կամ այն հարցը, նա բացարձակ մերժել է 3 տարի առաջ, հետո մերժեց նաև մեր հանդիպումը Արցախի հետ կապված՝ հետաձգելով: Եվ դրանից հետո, այս բոլոր խայտառակություններից հետո մենք գնանք իր հետ ի՞նչ խոսենք: Մենք ինչ էլ փորձում ենք ասել, պատ է այնտեղ, գնում է, հետ է գալիս: Մենք հիմա դիմել են ԱԺ երեք խմբակցություններին, որտեղ նշել ենք, որ ժամանակն է, որ Հայաստանի ԱԺ-ն լսումներ կազմակերպի, որի արդյունքում կարելի լինի ճանաչել ԼՂՀ ձևավորման օրինականությունը: Դրանով կհաստատվի, որ ԼՂՀ-ն դուրս է եկել Ադրբեջանի կազմից օրինական ճանապարհով: Արդեն անցել է 20 օր, ոչ մի պատասխան չկա»,-ասաց Արամ Գ. Սարգսյանը:
Նա նկատեց, որ Տիգրան Արզաքանցյանն անհեթեթ միտք է արտահայտել, թե եթե իրենք ընտրություններում չաջակցեին մեզ, մեր կուսակցությունը լուծարվելու էր. «30 տարվա կուսակցությունը ոչ մի կերպ այդպիսի պատճառով չէր լուծարվելու: Երկրորդ, իրենք մեր կուսակցության անվան տակ այնպիսի մի PR կազմակերպեցին իրենց, որը մեր կուսակցության իմիջի համար շատ մեծ վնաս էր: Ավելին չեմ ուզում մանրամասնել, տղամարդ եմ, չեմ ուզում էթիկայից դուրս գալ»,-ընդգծեց Սարգսյանը:
