Բաքվում Իրանի դեսպան Աբբաս Մուսավին ադրբեջանական Trend գործակալությանը տված հարցազրույցում հայտարարել է. «Իրանը Ղարաբաղյան առաջին և երկրորդ պատերազմներում Ադրբեջանի կառավարության և ժողովրդի կողքին է եղել և նույն կերպ էլ շարունակում է։ Շատ ուրախ ենք, որ Ադրբեջանի մեծ հաղթանակի առաջին տարեդարձն է մոտենում… Իրանը կիսում է Ադրբեջանի ժողովրդի ուրախությունը, քանի որ 30 տարվա տանջանքներից հետո Ադրբեջանը վերականգնել է իր տարածքային ամբողջականության նկատմամբ օրինական իրավունքը>>։
Ըստ նրա՝ Իրանի արտաքին քաղաքականությունը մի քանի սկզբունքների վրա է հիմնված և մերժում է ցանկացած տեսակի օկուպացիա և անջատողականություն․«Հոգևոր առաջնորդը նախորդ տարի հստակ հայտարարել է, որ Ադրբեջանի տարածքային ամբողջականությունը պետք է հարգվի և պահպանվի, և Հայաստանի կողմից օկուպացված տարածքները պետք է Ադրբեջանին վերադարձվեն»:
Իրանագետ Էմմա Բեգիջանյանն «Առաջին լրատվական»-ի հետ զրույցում նշեց՝ Աբբաս Մուսավին նախկինում Իրանի ԱԳ նախարարության խոսնակն էր ու ուներ հստակ ընդգծված ադրբեջանամետ, եթե ոչ պանթուրքիստական դիրքորոշում ունի․ «Պատերազմի ժամանակ էլ, դրանից հետո էլ նա ամեն առիթ օգտագործում էր ոչ տեղին հայտարարություններ անելու համար։ Ինչ վերաբերում է այն հանգամանքին, որ պատերազմի ժամանակ Ադրբեջանի կողքին են եղել, ապա այո՛ կողքին են եղել, բայց դա դեռ ոչինչ չի նշանակում։ Նշել ենք, որ այդ տարածքներն ըստ Իրանի պետք է վերադարձվեն Ադրբեջանին»։
Մեր զրուցակիցը նաև նշեց՝ արցախյան առաջին պատերազմի ժամանակ, Իրանն իհարկե օգնել է ադրբեջանցիներին, բայց նույն չափով, եթե ոչ ավել՝ նաև մեզ․«Բոլոր դեպքերում այդ օգնությունը եղել է և դա ոչ ոք ժխտել չի կարող»:
Ինչ վերաբերում է Իրան-Ադրբեջան հարաբերությունների լարվածությանը, իրանագետը նշեց․ «Փոխանակ ինքներս մեզ վրա հույս դնենք, հայտնի անեկդոտի նման՝ Աստված ասում է, էլի հայերը հույսը դրել են մեր վրա։ Մեր հարցերը մենք պետք է լուծենք։ Իրանն Ադրբեջանի հետ իր հարցերն այսպես թե այնպես կլուծի։ Ես բազմիցս ասել եմ՝ իրենց հարաբերությունները միշտ եղել են փոքր և մեծ ելևէջներով։ Պարզապես Իրանն ունի արժանապատվություն ու իրենց արժանապատվությանը հարիր չէ, որ Ադրբեջանը վերցնի ու ձերբակալի իրանցի վարորդներին։ Իրենք այդպես են մտածում՝ Ադրբեջանն ո՞վ եղավ, 100 տարվա պետություն է, բայց ձերբակալում է մեր վարորդներին։ Ամբողջ հարցը սա է։ Ու շատ կարևոր է, որ Հայաստանն Իրանի համար ունենա առանձին ճանապարհ, այն ինչ երազում են պանթուրքիստները՝ չլինի։ Նորից ու նորից իրենք կրկնեցին, որ սահմանների խախտում չպետք է լինի, մենք պետք է հստակ քայլեր ձեռնարկենք»:
Էմմա Բեգիջանյանը նշում է, որ Իրան-Ադրբեջան հարաբերությունները կկարգավորվեն առաջիկայում․«Ադրբեջանը պարզապես ուզում է հաստատել, որ դրանք իր տարածքներն են, անունը Էյվազլի է։ Եթե Իրանը թեկուզ սիմվոլիկ վճարի, կնշանակի, որ ճանաչում է դրանք որպես ադրբեջանի տարածք։ Նրանք շատ լավ ամեն ինչ կազմակերպել են, հստակ քարոզչություն են արել։ Իսկ մենք ի սկզբանե ու առ այսօր ոչինչ չենք արել»,-եզրափակեց նա։