Սերբիայի նախագահ Ալեքսանդր Վուչիչը հրամայել է բարձրացնել բանակի մարտական պատրաստությունը: Այդ մասին հայտարարել է երկրի Պաշտպանության նախարարությունը: Իրավիճակը սրել է Կոսովոյի սահմանային գոտում հատուկ նշանակության ուժերի տեղակայումը: Սերբերը կոսովացիների գործողությունները դիտարկել են որպես սադրանք:
Կոսովոյի ոստիկանության ստորաբաժանումները նախկինում տեղակայվել էին երկրի հյուսիսում գտնվող երկու սահմանային անցակետերում: Տարածաշրջանում գերակշռում են էթնիկ սերբերը, որոնք չեն ճանաչում Պրիշտինայի էթնիկ ալբանացիների կառավարությունը:
Հատուկ ջոկատներն այնտեղ են ժամանել կառավարության որոշման համաձայն, ըստ որի՝ սերբական համարանիշներով մեքենաներով վարորդներին կարգադրվել էր Կոսովո մտնելիս փոխել համարանիշները: Այս պահանջի դեմ բողոքի ցույցեր են սկսել հարյուրավոր էթնիկ սերբեր: Նրանք նաև տրանսպորտային միջոցներ են օգտագործել ՝ սահմանային անցակետերում երթևեկությունը փակելու համար:
ԵՄ դիվանագիտության ղեկավար Ժոսեպ Բորելը երկու կողմերին կոչ է արել նվազեցնել լարվածությունը: Հատուկ ջոկատայինները պետք է անհապաղ դուրս բերվեն սահմանից, ասել է նա ՝ ընդգծելով, որ «ցանկացած հետագա սադրանք կամ միակողմանի և չհամաձայնեցված գործողություն անընդունելի է»: ՆԱՏՕ-ի գլխավոր քարտուղար Յենս Ստոլտենբերգը նույնպես կողմերին զսպվածության և երկխոսության վերսկսման կոչ է արել: Դաշինքի ղեկավարը հեռախոսազրույց է ունեցել Սերբիայի նախագահի և Կոսովոյի վարչապետ Ալբին Կուրտիի հետ:
