Արցախում, մասնավորապես, Ստեփանակերտում պատերազմից հետո ջրի, հոսանքի և ինտերնետի մատակարարման առումով լուրջ խնդիրներ են առաջացել:
Ստեփանակերտից մեզ հայտնեցին, որ վերջին օրերին կրկին պարբերաբար հոսանքի անջատումներ են եղել: Բանն այն է, որ մինչև պատերազմը հոսանքի երկու գիծ էր Հայաստանից մտնում Արցախ՝ մեկը Քարվաճառով, մյուսը՝ Լաչինով: Եթե մի գծում վթար էր լինում, մյուսն էր հոսանք հասցնում, դրա համար հոսանքը չէր կտրվում: Հիմա Քարվաճառի գիծը չկա, ու եթե Լաչինով եկող գծում վթար է լինում, հոսանքն անջատվում է: Մինչև վթարը գտնում, վերացնում են, որոշակի ժամանակ է տևում:
Բացի այդ, կան նաև Արցախում գործող մի քանի ՀԷԿ-երը, որոնցից մեծը Սարսանգի ՀԷԿ-ն է, որոնք նույնպես անհրաժեշտության դեպքում հոսանքով ապահովում են Ստեփանակերտը:
«Երբ հոսանքն անջատվում է, մենք մի քանի ՀԷԿ ունենք, հիմնականում Սարսանգի ՀԷԿ-ն է, էնտեղից հոսանքը միացնում ենք: Դա լինում է ջրի պաշարների հաշվին, դե այդ ՀԷԿ-ն էլ միշտ չէ, որ դիմանում է: Օրինակ, ձմռանը հոսանքի սպառումը մեծանում է և մի գծի վրա այդ ծանրաբեռնվածությունը լուրջ խնդիր է առաջացնում: Այսինքն ձմռանը կարող է պարբերաբար անջատվել: Արդեն հիմա այդպես է, երբ վթար է լինում, Արցախում հոսանքն անջատվում է, հետո սկսում են կամաց-կամաց միացնել: Ժողովուրդն էլ սկսում է կասկածել, որ թուրքերն են անում, որ հոսանքն անջատվում է:
Ինտերնետն էլ է պարբերաբար անջատվում: Թուրքերը պոմեխա են տալիս և կտրվում է ինտերնետային կապը: Ամեն ինչ անում են, որ թողնենք գնանք», – ասացին մեզ Ստեփանակերտից:
Միաժամանակ փաստ է նաև այն, որ պատերազմից հետո Արցախում հսկայական աշխատանք է կատարվել, էլեկտրացանցերին հասցված մեծ վնասները ամբողջությամբ վերականգնվել են. «Արդեն 9 ամիս գիշեր-ցերեկ աշխատում են վերականգնման վրա: Շուշիում էլ աշխատանքներ կար անելու, ռուսների միջոցով գնացել, սարքել են: Պայթեցված բոլոր ենթակայանները վերականգնել են:»,-ասաց «Առաջին լրատվական»-ի Ստեփանակերտի աղբյուրը:
