Ադրբեջանական Salam News գործակալության փոխանցմամբ՝ Իրանի հատուկ ծառայությունները Իրաքի սահմանին ձերբակալել են Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) երկրորդ դեմքին՝ Մուրադ Քարայըլանին։ Այս մասին հայտարարել է Իրանի խորհրդարանի անվտանգության ու արտաքին քաղաքականության կոմիտեի ղեկավար Ալադդին Բուրուջերդին։
Վերջինս հաստատել է ավելի վաղ այդ մասին շրջանառության մեջ մտած խոսակցությունները. «Այդ տեղեկությունները համապատասխանում են իրականությունը։ Իրանական հատուկ ծառայություններն արդեն վնասազերծել են Մուրադ Քարայըլանին։ Հատուկ աչքի են ընկել Իսլամական հեղափոխության պահապանների կորպուսի աշխատակիցները։ Այսուհետ նույնպես մենք հարվածներ կհասցնենք PKK-ին»։
Հիշեցնենք, որ PKK-ն հիմնադրվել է 1978 թվականին՝ քուրդ առաջնորդ Աբդուլլահ Օջալանի կողմից։ Քարայըլանը PKK-ին միացել է 1979 թվականին և 1999 թվականին Օջալանի ձերբակալումից հետո դարձել է նրա փաստացի ղեկավարը։
