Ռուսական Regnum գործակալության փոխանցմամբ՝ Աբխազիայի նախագահական թեկնածու Ռաուլ Խաջիմբան Սուխումի Нужная թերթին տված հարցազրույցի ժամանակ հայտարարել է, որ աբխազները պետք է օրինակ վերցնեն Ղարաբաղից.
«Շատ ոլորտներում Լեռնային Ղարաբաղը և նրա քաղաքացիները մեզ համար փայլուն օրինակ են ծառայում։ Մի քանի տարի առաջ ես եղել եմ Ղարաբաղում։ Այն, ինչ ես տեսա այնտեղ, հաճելիորեն զարմացրեց ինձ։ Աբխազիան կարող է կյանքի տարբեր ոլորտներում ընդօրինակել ղարաբաղցիների փորձը։
Սակայն ինձ թվում է, թե ամենագլխավորն այն է, որ ղարաբաղցիներին հաջողվել է ավարտին հասցնել բանակաշինության գործընթացը։ Նրանց մոտ դա բավական լավ է ստացվում, քան մեզ մոտ։ Բանակաշինության ոլորտում Լեռնային Ղարաբաղի հաջողությունը պայմանավորված է նրանով, որ նրա բնակիչներն ամուր ցանկություն ունեն՝ կառուցելու իրենց անկախ պետությունը։
Ղարաբաղցիներին հաջողվել է համեմատաբար կարճ ժամանակահատվածում վերացնել պատերազմի հետքերը։ Ռազմական գործողությունների արդյունքում լիովին ավերված Արցախի մայրաքաղաք Ստեփանակերտն ամբողջությամբ վերականգնված է։ Մյուս հանգամանքը, որ իմ դուրը եկավ, դա պատերազմի վետերանների նկատմամբ ցուցաբերած վերաբերմունքն է։ Նրանց հանդեպ անսահման հարգանք են տածում։ Մեզ անհրաժեշտ է օրինակ վերցնել ղարաբաղցիներից»։
Խաջիմբան անդրադարձել է նաև օգոստոսի 26-ին նշանակված Աբխազիայի նախագահական ընտրություններում տեղի հայ համայնքի դերակատարությանը. «Նախորդ ընտրություններում Աբխազիայի հայ համայնքը գործնականում միաձայն աջակցել է գործող իշխանություններին, սակայն արդյունքում դա ոչ մի կերպ չանդրադարձավ իշխանական մարմիններում հայ ներկայացուցիչների թվաքանակի վրա։ Փաստացիորեն մարդկանց խաբեցին։ Չպետք է կրկնել այդ սխալը»։
Հիշեցնենք, որ հունիսի կեսերին Կովկասի հարցերով վրացի փորձագետ Մամուկա Արեշիձեն հայտարարեց, որ Ռաուլ Խաջիմբան համարվում է Վրաստանի նախկին նախագահներից Էդուարդ Շևարդնաձեի կադրը՝ ընդգծելով, որ Խաջիմբան ժամանակին հանդիսացել է անվտանգության ծառայության աշխատակից և միաժամանակ Վրաստանի ՆԳՆ-ի շտաբի պետ։
