Երկուշաբթի ուշ երեկոյան աֆղանական մի քանի քաղաքներում ակցիաներ են անցկացվել։ Ցուցարարներն իրենց աջակցությունն են հայտնել հյուսիսային Փանջշիր նահանգի ազգային դիմակայության ուժերին, որոնք չեն ենթարկվում երկրում իշխանությունը զավթած «Թալիբան» արմատական շարժմանը։ Այս մասին հայտնում է Herat Times-ը։
Ի աջակցություն թալիբներին դիմակայելու Ահմադ Մասուդի կոչի և ընդդեմ արմատականների հետ համագործակցող Պակիստանի իշխանությունների քաղաքականության՝ գլխավոր ակցիաներն անցկացվել են Քաբուլում, կենտրոնական Դայկունդի նահանգում, ինչպես նաև Գազնի և Հերաթ քաղաքներում, որոնք գտնվում են համաատասխանաբար երկրի արևելքում և հյուսիս-արևմուտքում։ Զանգվածային երթ է անցկացվել երկրի՝ մեծությամբ չորրորդ քաղաք Մազարի-Շարիֆում, որը գտնվում է երկրի հյուսիսում։ Ցուցարարները հանդես են եկել «Մահ Թալիբանին», «Մահ Պակիստանին» կարգախոսներով։ Ցույցերի ընթացքում որևէ միջադեպի մասին չի հաղորդվում։
