Գվինեայում տեղի ունեցած պետական հեղաշրջումից հետո ալյումինի գինը բարձրացել է՝ հասնելով տասնամյակի առավելագույն ցուցանիշին: Այդ մասին են վկայում Լոնդոնի մետաղների բորսայի (LME) տվյալները:
Ալյումինի մեկ տոննայի արժեքը հասել է 2775,5 դոլարի, ինչը ռեկորդային արժեք է 2011 թվականի մայիսից ի վեր: Այնուհետև փոքր-ինչ գնանկում է նկատվել։
Սեպտեմբերի 5-ին զինվորականները հայտարարեցին իշխանությունը զավթելու մասին և ձերբակալեցին երկրի նախագահ Ալֆա Կոնդեին: Հայտարարություններ հնչեցին սահմանների փակման, կառավարության և խորհրդարանի լուծարման և սահմանադրության կասեցման մասին:
Երկրում տիրող քաղաքական իրավիճակը լուրջ մտահոգություններ է առաջացրել երկրից բոքսիտի՝ ալյումինի արտադրական հումքի մատակարարման վերաբերյալ: Ըստ ռուս միլիարդատեր Օլեգ Դերիպասկայի ՝ ալյումինի շուկան կարող է լուրջ ցնցումների առաջ կանգնել:
«Ալյումինի շուկան կարող է լրջորեն ցնցվել այս իրավիճակից: Աշխարհում ամբողջ ալյումինի 20 տոկոսն արտադրվում է բոքսիտից, որն արդյունահանվում է այս փոքր և շատ աղքատ երկրում»,- ասել է նա: