Միացյալ Նահանգների և Ուկրաինայի միջև համաձայնագիրը, որը ստորագրվել է երեքշաբթի, Վաշինգտոնում՝ երկու երկրների պաշտպանության նախարարների կողմից, նպատակ ունի ընդլայնել Ուկրաինայում ռազմական բարեփոխումները, ապահովել «անվտանգությունը Սև ծովում», ինչպես նաև փոխգործակցությունը կիբերանվտանգության և հետախուզության ոլորտներում։ Այս մասին Վաշինգտոնում Ուկրաինայի նախագահ Վլադիմիր Զելենսկու հետ հանդիպման ժամանակ ասել է ԱՄՆ պաշտպանության նախարար Լլոյդ Օսթինը:
Նրա խոսքով, «շրջանակային համաձայնագիրը» թույլ կտա «ընդլայնել համագործակցությունը և խթանել ընդհանուր առաջնահերթությունները», որոնք ներառում են «դիմակայություն ռուսական ագրեսիային», ինչպես նաև «պաշտպանական արդյունաբերության բարեփոխումների իրականացումը, որոնք նպաստում են Ուկրաինայի՝ ՆԱՏՕ -ին անդամակցությանը և համագործակցության խորացմանը»:
Ըստ Օսթինի, Վաշինգտոնում ստորագրվող մեկ այլ փաստաթուղթ է «հետազոտությունների և զարգացման, փորձարկումների և գնահատումների ոլորտում» համաձայնագիրը, որը պայմաններ կստեղծի երկկողմ տեխնոլոգիական ռազմական համագործակցության համար, ներառյալ մասնավոր հատվածի ներգրավմամբ։
«Այսօր մեր աջակցությունը Ուկրաինայի ինքնիշխանությանը, տարածքային ամբողջականությանը և եվրաատլանտյան նկրտումներին անսասան է»,-ասել է Օսթինը: «ԱՄՆ-ը և մեր դաշնակիցները հավատարիմ են աջակցելու Ուկրաինայի իրավունքին ՝ որոշելու իր արտաքին քաղաքականությունն առանց արտաքին միջամտության: Դուք կարող եք ապավինել մեր շարունակական աջակցությանը ՝ Ռուսաստանի ագրեսիայի դեպքում, որը կօգնի Ուկրաինային իրականացնել իր եվրաատլանտյան ձգտումները»,-ասել է Պենտագոնի ղեկավարը:
