«Առաջին լրատվականը» փորձեց պարզել՝ ի՞նչ կրթություն ունեն Հայաստանի, Ադրբեջանի, Վրաստանի և Թուրքիայի առաջնորդները:
Ըստ այդմ՝ ՀՀ նախագահ Սերժ Սարգսյանը բարձրագույն կրթություն է ստացել Հայաստանում, իսկ Ադրբեջանի ու Թուրքիայի նախագահները բարձրագույն կրթություն են ստացել ու ստաժավորում անցել համապատասխանաբար՝ Մոսկվայում ու Լոնդոնում:
Թուրքիայի նախագահ Աբդուլլահ Գյուլը միջնակարգ կրթությունը ստացել է Ստամբուլում, ապա տնտեսագիտություն ուսանել տեղի համալսարանում, ստաժավորում անցել Լոնդոնում ու Էքսետերեում: Որոշ ժամանակ Լոնդոնում ուսանելուց հետո տնտեսագիտություն է դասավանդել Ստամբուլի համալսարանում, որին զուգահեռ, մինչև 1990-ական թվականներն աշխատել է Իսլամական բանկում:
Ադրբեջանի նախագահ Իլհամ Ալիևն ավարտել է Բաքվի թիվ 6 միջնակարգ դպրոցը, ապա ընդունվել Մոսկվայի միջազգային հարաբերությունների պետական ինստիտուտ: Ավարտելուց հետո Ի. Ալիևը 1982 թ. ընդունվել է նույն իստիտուտի ասպիրանտուրան, ստացել պատմական գիտությունների թեկնածուի կոչում, ապա դասավանդել Մոսկվայի միջազգային հարաբերությունների պետական ինստիտուտում:
Վրաստանի նախագահ Միխեիլ Սաակաշվիլին 1984 թ. ոսկե մեդալով ավարտել է Թբիլիսիի թիվ 51 միջնակարգ դպրոցը, ապա ուսում ստացել արտերկրի տարբեր հաստատություններում: Նախ՝ 1992 թ. գերազանցությամբ ավարտել է Շևչենկոյի անվան Կիևի միջազգային հարաբերությունների ինստիտուտի միջազգային իրավունքի ֆակուլտետը:
Որոշ ԶԼՄ-ների տվյալներով՝ 1989 թ. Սաակաշվիլին հեռացվել է Համալենինյան երիտասարդական կոմունիստական միությունից դիսիդենտական գրականության տարածման համար: Համալսարանում վերականգնվել է 1989-1990 թթ. ԽՍՀՄ-ի սահմանապահ զորքերում ծառայելուց հետո: 1993 թ. նա, որպես իրավաբան-խորհրդատու, աշխատել է Թբիլիսիի մարդու իրավունքների պաշտպանության կոմիտեում, նույն տարվա վերջում դարձել ԱՄՆ Կոնգրեսի կրթաթոշակառու և ուսման նպատակով մեկնել Նյու Յորքի Կոլումբիայի համալսարան, որտեղ էլ 1994 թ. ստացել է մագիստրոսի կոչում: Վրաստանի նախագահը 1995 թ. գիտությունների դոկտորի կոչում է ստացել Ջորջ Վաշինգտոնի անվան համալսարանում: Բացի այդ՝ 1993-1995 թթ. կուրսեր է անցել Ստրասբուրգի մարդու իրավունքների միջազգային ինստիտուտում, Եվրոպական իրավունքի ակադեմիայում (Ֆլորենցիա) և Միջազգային իրավունքի ակադեմիայում (Հաագա):
1995 թ. Վրաստան վերադառնալուց հետո սկսել է քաղաքական գործչի իր կարիերան:
Եվ վերջապես, ՀՀ նախագահ Սերժ Սարգսյանն ավարտել է Ստեփանակերտի միջնակարգ դպրոցը, 1971 թ. ընդունվել է Երևանի պետական համալսարան, այդ ընթացքում ծառայել է ԽՍՀՄ զինված ուժերում, ապա 1979 թ. ավարտել ԵՊՀ բանասիրական ֆակուլտետի երեկոյան բաժինը:
