Ֆրանսիայի նախագահ Էմանուել Մակրոնը հայտարարել է, որ «Թալիբան» շարժման հետ բանակցությունները չեն կանխորոշում դրա հետագա ճանաչումը:
Ժողովրդավարությունը չի կարող պարտադրվել դրսից: Սա այն դասերից մեկն է, որն Արևմուտքը պետք է քաղի աֆղանական փորձից: Այս մասին հայտարարել է Ֆրանսիայի նախագահ Էմանուել Մակրոնը TF1 հեռուստաալիքին տված հարցազրույցում, որն անցկացվել է Իրաքյան Քրդստանի մայրաքաղաք Էրբիլում, գրում է Интерфакс-Украина- ն:
«Չի կարելի կառավարությանը ժողովրդավարություն պարտադրել դրսից: Երբ մենք միջամտում ենք, դա պետք է անենք ինքնիշխան պետության հետ համատեղ: Ինքնիշխան պետությունը զենքի ուժով չի ստեղծվում», – ասել է Մակրոնը:
«Վերահսկողությունը (իշխանության վրա. -խմբ.) Թալիբանի ձեռքերում է:Մենք պետք է այդ բանակցությունները վարենք շատ գործնական եղանակով, բայց դա չի կանխորոշում ճանաչումը», – ասել է Ֆրանսիայի նախագահը:
Նա հաստատել է, որ Թալիբանի հետ բանակցություններ են սկսվել Աֆղանստանում հումանիտար գործողությունների, մասնավորապես, Աֆղանստանի քաղաքացիների տարհանումն օգոստոսի 31-ից հետո շարունակելու վերաբերյալ:
