Եվրամիությունը հույս ունի շուտով ընդունել «Միգրացիայի և ապաստանների մասին նոր պայմանագիրը»: Այս մասին հայտնել է Եվրոպական հանձնաժողովը՝ մեկնաբանելով Բելառուսի հետ սահմանին միգրացիոն լարվածությունը:
Արևելյան Եվրոպայի երկրներն արդեն ինքնուրույն են լուծում հարցը. Լիտվան և Լեհաստանը, որոնք այս ամառ բախվեցին Բելառուսի տարածքով իրենց երկիր մուտք գործող անօրինական միգրանտների հոսքին, սկսեցին պատ կառուցել իրենց սահմանին: Նույնը անելու մտադրության մասին, եթե իրավիճակը սահմանին չփոխվի, հայտարարել է նաև Լատվիան:
Լիտվան, Լատվիան և Լեհաստանն ուղղակիորեն մեղադրում են Ալեքսանդր Լուկաշենկոյի ռեժիմին՝ Մերձավոր Արևելքից և աֆրիկյան երկրներից միգրանտներին որպես «հիբրիդային զենք» օգտագործելու մեջ: Մինսկը իբրև թե այսպես է պատասխանում ԵՄ պատժամիջոցներին և օդային շրջափակմանը: Ի նշան համերաշխության՝ Էստոնիան նույնպես աջակցում է իր հարևաններին ՝ օգոստոսի սկզբին ուժեղացնելով սահմանային վերահսկողությունը:
ՄԱԿ -ը չափազանց մտահոգված է միգրանտների վիճակով, ովքեր սահմանամերձ գոտիներում ապրում են առանց տարրական միջոցների. նրանց թույլ չեն տալիս մուտք գործել ԵՄ, իսկ Մինսկը չի թույլատրում վերադառնալ Բելառուս: Կազմակերպությունը կարծում է, որ թողնելով միգրանտներին այս վիճակում՝ երկրները խախտում են իրենց միջազգային պարտավորությունները:
Եվրամիությունը լիովին պաշտպանում է Լատվիայի, Լիտվայի և Լեհաստանի դիրքորոշումը: Նրանք կտրականապես մերժում են «մարդկանց քաղաքական նպատակներով օգտագործելու» փորձերը:
Սահմանի ճգնաժամը ստիպեց ԵՄ-ին ակտիվորեն բարեփոխել միգրացիոն քաղաքականությունը: Այս գործընթացը մեկնարկել է գրեթե մեկ տարի առաջ. 2020 թվականի սեպտեմբերին Եվրոպական միությունը ներկայացրեց «Միգրացիայի և ապաստանների մասին» նոր նախագիծը: Համապատասխանաբար, այն երկրները, որոնք միգրանտներին ընդունում են եվրոպական քվոտայով, կամ ընդհանուր բյուջեից գումար են ստանում նրանց պաշտպանության համար, կամ հետ են ուղարկում իրենց հաշվին: Մեխանիզմը դեռ գործողության մեջ չի մտել: Այնուամենայնիվ, չնայած ճգնաժամին, փաստաթղթի հաստատումը հարցականի տակ է:
