Աֆղանստանի մայրաքաղաք Քաբուլում ԱՄՆ դեսպանատան աշխատակիցներին հանձնարարվել է սկսել գաղտնի փաստաթղթերի, ինչպես նաև պետական դրոշի կամ ամերիկյան գերատեսչությունների լոգոտիպների պատկերներով առարկաների ոչնչացումը, հաղորդում է CNN-ը:
Հեռուստաալիքի տվյալներով՝ խոսքն այն առարկաների մասին է, որոնք «կարող են օգտագործվել քարոզչական նպատակներով»:
Դիվանագիտական կորպուսում լրագրողների աղբյուրը հայտնել է, որ հետախուզությունը չի բացառում թալիբների կողմից Քաբուլի մեկուսացումը առաջիկա երեքից յոթ օրվա ընթացքում: Սակայն դա չի նշանակում, որ գրոհայինները կմտնեն Աֆղանստանի մայրաքաղաք, ասել է աղբյուրը:
ԱՄՆ Պետդեպարտամենտը, մեկնաբանելով այս տեղեկատվությունը, դեսպանատանը փաստաթղթերի ոչնչացումը համարել է ստանդարտ ընթացակարգ, հայտնում է The Hill- ը:
Ամերիկյան զորքերի դուրսբերման մասին հայտարարությունից հետո «Թալիբան» ահաբեկչական խմբավորումը արագ հարձակում է սկսել աֆղանական բանակի դիրքերի վրա: Աֆղանստանի կառավարության վիճակն ամեն օր ավելի կրիտիկական է դառնում: Վերջին շաբաթվա ընթացքում թալիբները կարողացել են գրավել 16 նահանգի մայրաքաղաքներ:
Ինչպես արդեն հայտնել ենք, ԱՄՆ նախագահ Ջո Բայդենն Աֆղանստանում տիրող իրավիճակի հարցով հանդիպում է անցկացրել։
Երեկ ՄԱԿ-ի գլխավոր քարտուղար Անտոնիու Գուտերեշը հայտարարել էր Աֆղանստանում իրադրության՝ վերահսկողությունից դուրս գալու մասին։
Թալիբներն իրենց հերթին հավաստիացրել են Աֆղանստանի հարևան երկրների, ինչպես նաև Իսլամական Հանրապետությունում գտնվող օտարերկրյա դիվանագիտական առաքելությունների և միջազգային կազմակերպությունների անդամների համար սպառնալիքի բացակայության մասին։
