Այսօր Վերաքննիչ դատարանում կայացավ 2001 թ. Վայքի զորամասում սպանված Արայիկ Ավետիսյանի գործի քննությունը։ Արայիկի մայրը՝ Անահիտ Մկրտչյանը, հայցով դիմել էր դատարան. ըստ նրա՝ դատախազ Կարեն Հարությունյանը և քննիչ Արմեն Թամրազյանը չեն իրականացրել գործի արդար քննություն։ «Արդեն 10 տարի է՝ իմ որդին մահացել է, սակայն օբյեկտիվ նախաքննություն նախաքննական մարմինը դեռ չի իրականացրել»,- դատարանի դահլիճում ասաց Անահիտ Մկրտչյանը։
Արայիկ Ավետիսյանի սպանությունը տեղի է ունեցել գումարտակի շտաբի պետի սենյակում: Գործի առթիվ կրտսեր սերժանտ Արտյոմ Խաչատրյանը, ով այդ օրը ներկա է եղել Արայիկի և շտաբի պետի հանդիպմանը, ցուցմունք է տվել և պատմել սենյակում տեղի ունեցածը, սակայն այժմ զինվորը հրաժարվում է իր տված ցուցմունքից։
Տիկին Մկրտչյանին տարօրինակ է թվում, որ 19 քննություններից հետո իրեղեն ապացույց ճանաչված զենքը՝ «Մակարով» տեսակի ատրճանակը, և Արայիկի մահվան պատճառ դարձած վնասվածքն այժմ չեն համապատասխանում, և հիմա էլ ասում են գլխին կրակոցն Արայիկն իբր ստացել է «ՏՏ» ատրճանակից։ Բացի այդ, թեև զենքը անցել է հինգ հոգու ձեռքով, դրա վրա որևէ մատնահետք չկա։
Դատավոր Չիչոյանը, քննելով հայցը, ի վերջո, մերժեց այն:
Դատից հետո Արայիկի մայրը լրագրողներին տվեց իր մեկնաբանությունը. «10 տարի է իմ տղայի սպանությունը կատարող անձը հայտնի չէ՝ այն պարագայում, երբ բոլորը գիտեն, որ տղայիս սպանել է գումարտակի հրամանատարը՝ Մհեր Ստեփանյանը»։ Անահիտ Մկրտչյանը կարծում է, որ գործը իսկապես կբացվի, երբ հանրապետության նախագահի պաշտոնում այլևս չլինի Սերժ Սարգսյանը։
