Սուրբ Աստվածածնի վերափոխման կամ Խաղողօրհնեքի տոնը Հայ Առաքելական եկեղեցու 5 տաղավար տոներից է, որի մասին հիշատակություններ կան դեռ 5-րդ դարից: Այս մասին այսօր լրագրողների հետ հանդիպմանն ասաց տեր Շմավոն քահանա Ղևոնդյանը՝ հավելելով, որ այս տոնը հաջորդում է Սուրբ Ծննդյան, Սուրբ Հարության, Պայծառակերպության տաղավար տոներին:
«Կան անշարժ և շարժական տոներ: Սուրբ Աստվածածնի վերափոխման տոնը շարժական է ու նշվում է օգոստոսի 15-ին մոտ գտնող կիրակի օրը»,- տեղեկացրեց քահանան:
Նրա խոսքով՝ այդ օրը Հայ Առաքելական բոլոր եկեղեցիներում մատուցվում է սուրբ պատարագ, ապա օրհնվում են խաղողներն ու մյուս պտուղները, իսկ հնում մինչև խաղողի օրնությունը մարդիկ հրաժարվել են խաղող ճաշակելուց:
Նա մարդկանց կոչ արեց Սուրբ Աստվածածնի վերափոխման տոնին չգնալ գերեզմանոցներ, հուղարկավորություն չկատարել, «ուրախության տոնը չվերածել լաց ու կոծի»:
Հարցին, թե ինչու է եկեղեցում հատկապես խաղող օրհնվում, տեր Շմավոն քահանան պատասխանեց, որ խաղողը հենց այն պտուղն է, որից գինի են պատրաստում, և գինի ու հաց ճաշակելով՝ մարդիկ ճաշակում են Քրիստոսի մարմինն ու արյունը:
Նա նաև հավատացյալներին խորհուրդ տվեց այդ օրը գինու գավաթի, «քաղցր սեղանի» շուրջ նստել, զրուցել ու վայելել տոնի խորհուրդը:
