Սանկտ-Պետերբուրգում տեղի է ունենում ՌԴ նախագահ Պուտինի և Բելառուսի նախագահ Լուկաշենկոյի արտակարգ հանդիպումը: Արտակարգ այն իմաստով, որ հանդիպումը տեղի է ունենում նախապես չպլանավորած և համենայնդեպս Լուկաշենկոյի Սանկտ-Պետերբուրգ այցի մասին հայտնի է դարձել դրանից մի քանի ժամ առաջ, երբ Բելառուսի նախագահի նստավայրին մոտ կանգնած Տելեգրամ ալիքներից մեկը հայտնեց, որ թիվ մեկ օդանավը պատրաստվում է թռչել դեպի Ռուսաստան: Ինչ հարցեր են քննարկում արտակարգ ռեժիմով հանդիպած Պուտինն ու Լուկաշենկոն, որոնք ընդամենը օրեր առաջ էին հանդիպում ունեցել Սոչիում, պարզ չէ:
Խոսվում է երկկողմ, ինտեգրացիոն օրակարգի մասին, թեև կասկած չկա, որ անգամ այդ օրակարգի համատեքստում, տեղի է ունեցել կամ ունենալու նշանակալի ինչ-որ բան, եթե առաջացել է այդ օրակարգը արտահերթ ռեժիմով քննարկելու անհրաժեշտություն: Հնարավոր է, որ հանդիպումից հետո կլինեն ինչ որ հայտարարություններ, որոնք թույլ կտան ընդհանուր պատկերացման մակարդակում գոնե հասկանալ արտակարգ հանդիպման պատճառը կամ մոտիվը: Իսկ դրանից առաջ, լույս տեսավ Պուտինի հոդվածն Ուկրաինայի մասին, ուկրաինացիների և ռուսների ընդհանրությունների մասին, որտեղ սակայն Պուտինը նաև լայն իմաստով ներկայացնում էր ՌԴ տարածքային հավակնությունները հետխորհրային հանրապետությունների նկատմամբ, իհարկե «պատմական էքսկուրսի», ոչ ուղղակի իմաստով: Ռուսաստանի խնդիրներն այդ առումով իհարկե բավականին լայն են, սակայն ակնառու է նաև, որ ներկայումս Մոսկվայի համար թիվ մեկ խնդիրը կամ աշխարհաքաղաքական «էպիկենտրոնը» տեղափոխվում է միջինասիական ռեգիոն, որտեղ ընդհուպ դրված է հարց՝ Մոսկվան կմտնի՞ նոր ռազմական գործողությունների դաշտ, թե՞ հնարավոր կլինի զերծ մնալ դրանից և պայմանավորվել:
Ամբողջ հարցն այն է, որ պայմանավորվելու կողմերը այստեղ բավականին շատ են: Բացի միջինասիական հետխորհրդային հանրապետություններից, որոնց թերևս նաև քողարկված ազդակ կամ հաղորդագրություն էր Պուտինի հոդվածը՝ տարածքային հանգամանքների և Ռուսաստանից ստացված «նվերների» իմաստով, միջինասիական ռեգիոնում Մոսկվան պետք է պայմանավորվի Չինաստանի, Պակիստանի, Հնդկաստանի, Իրանի, Թուրքիայի, և հավելյալ՝ թալիբների հետ:
Անկասկած է, որ կա շատ բարդ շրջանակ, հետևաբար նաև պայմանավորվածությունների հասնելու բավականին բարդ հեռանկար: Ահա այդ ֆոնին Պուտինն արտակարգ հանդիպում է ունենում Լուկաշենկոյի հետ, որը այս պահին թերևս Պուտինի համար բացառիկ նշանակություն ունեցող ֆիգուր է, մեծ հաշվով՝ նախագահի ընտրությունից հետո նաև պարզապես քաղաքական կամ գուցե նույնիսկ ռազմա-քաղաքական «մահապարտ», նրա համար: