Հունիսի 24-ին տեղի է ունեցել Հայաստանի վարչապետի պաշտոնակատար Նիկոլ Փաշինյանի և ՌԴ նախագահ Վլադիմիր Պուտինի հեռախոսազրույցը: Դրա ընթացքում ՌԴ նախագահը շնորհավորել է Հայաստանի վարչապետին ընտրությունը բարեհաջող անցկացնելու և հաղթանակի կապակցությամբ: Երկու պաշտոնյաները քննարկել են երկկողմ հարաբերությունը խորացնելու հարցեր և պայմանավորվել անձնական շփումները շարունակելու վերաբերյալ: Միաժամանակ, հեռախոսազրույցի ընթացքում քննարկվել է նոյմբերի 9-ի և հունվարի 11-ի եռակողմ հայտարարությունների կատարման անհրաժեշտությունը, իսկ ՌԴ նախագահը նշել է, որ Ռուսաստանը կշարունակի իրավիճակի լիցքաթափմանն ու կայունությանն ուղղված ջանքի գործադրումը:
Քաղաքագետ, ՔժԿ նախագահ Լևոն Շիրինյանի կարծիքով՝ եթե Պուտինը չշնորհավորեր Փաշինյանին, իրեն կդիրքավորեր որպես թշնամի պետությունը․«Իսկ այժմ դեմքը փրկելու համար ուղղում է այդ շնորհավորանքը։ Եվ հետո ինչո՞ւ չշնորհավորեր՝ զանգվածային խախտումներ չեն եղել, իրենց մարդիկ էլ լցվել են խորհրդարան։ Դժգոհությունն ինչի՞ շուրջ պետք է լիներ»,-«Առաջին լրատվական»-ի հետ զրույցում ասաց նա։
Շիրինյանի խոսքերով՝ ընտրություններն անցել են ազատ, ժողովուրդն էլ իր կամքը դրսևորել է․«Եթե անգամ չուզի էլ՝ պետք է ընդունի։ Սա արտաքին շերտն է, իսկ մեզ համար կարևոր է ներքինը՝ թե ինչ գործընթացներ են տեղի ունենում։ Դա էլ այս օրերին չի երևա։ Շարունակելո՞ւ է դավադիրների թիկունքը մնալ։ Քոչարյանի ու Վանեցյանի վերաբերմունքը ցույց կտա, թե նա ինչ է մտածում։ Արտառոց որևէ բան չի եղել, ուստի Ռուսաստանն արտաքնապես ձևը կպահի։ Նրանք չեն կարող չընդունել այս իշխանությանը։ Ընտրություն չի՞ եղել, ՔՊ-ն մեծամասնություն չի՞ կազմել, կազմել է։ Զանգվածային խախտումներ չեն եղել, հակառակը՝ եղել է ժողովրդի կամարտահայտություն։ Բայց ներքին գործընթացները պետք է հասկանանք։ Ժողովուրդը միանշանակ քվեարկել է անկախ պետականության օգտին՝ ընդդեմ գողապետության, ընդդեմ ռևանշի վերադարձի։ Ժողովուրդն ուզում է անկախ ու սուվերեն պետություն։ Ինչքան էլ որ կազմակերպեցին, որ իշխանություն վերցնեն՝ չկարողացան։ Հիմա պետք է ներքին տեղեկատվությունը հասկանանք՝ դա էլ մուտանտ հայերի տեսքով իրենց հեռուստահաղորդումներով կհանրայնացնեն իրական վերաբերմունքը։ Բայց միանշանակ է՝ ժողովուրդը քվեարկել է անկախ պետականության փրկության ազատության օգտին, ընդդեմ ռևանշիզմի»,-եզրափակեց նա։
Քաղաքագետ Արմեն Վարդանյանն էլ «Առաջին լրատվական»-ի հետ զրույցում նշեց՝ Կրեմլի ֆավորիտ թեկնածուները Քոչարյանն ու Վանեցյանն էին, սակայն Փաշինյանի հաղթանակից հետո Կրեմլին այլ բան չի մնում, քան շարունակել աշխատել ՀՀ պաշտոնական իշխանությունների հետ․«Իրենք այլևս որևէ բան չեն կարող անել։Ոսւտի կշարունակվի հարաբերությունների այն մակարդակը,որը կար Նիկոլ Փաշինյանի օրոք»։
Վարդանյանը,միևնույն ժամանակ ընդգծեց, խորհրդարանի այս պատկերը շատ ձեռնտու է Մոսկվային․ «Իհարկե այլևս արևմտամետ ուժ չկա, կան քիչ թե շատ ռուսամետ ուժեր։ Բայց ամեն դեպքում՝ երկրի պաշտոնական քաղաքականությունը վարում է գործող իշխանությունը և ոչ ընդդիմությունը։ Այս տեսանկյունից Մոսկվայի համար ոչինչ չի փոխվել»։
