Գեղարքունիքի մարզպետը հայտարարել է, որ մոտ օրերս հայ-ադրբեջանական սահմանի Գեղարքունիքի հատվածում կտեղակայվեն ռուս-սահմանապահներ, իսկ հայ-ադրբեջանական ուժերը հայելային տրամաբանությամբ կքաշվեն հետ՝ սահմանային վեճի հանգուցալուծման համատեքստում, շարունակելով եռակկողմ քննարկումները սահմանների հարցում: Մարզպետի հայտարարությունն առաջացնում է հարցեր, կապված Հայաստանի վարչապետի պաշտոնակատար Նիկոլ Փաշինյանի ավելի վաղ արած առաջարկության հետ:
Նիկոլ Փաշինյանը շաբաթներ առաջ առաջարկել էր Գեղարքունիքի մարզի Սոթք-Խոզնավար հատվածում սահմանային խնդիրը լուծել Մինսկի խմբի համանախագահ երկրների դիտորդների ներգրավումով, հայելային եղանակով հավասարաչափ հետ քաշելով հայ-ադրբեջանական ուժերը և ստեղծելով որոշակի բուֆերային տարածք, որտեղ կաշխատեն դիտորդները:
Քաղաքագետ Անդրիաս Ղուկասյանը «Առաջին լրատվական»-ի հետ զրույցում կարծիք հայտնեց, որ Նիկոլ Փաշինյանի հայտարարությունը վերաբերում էր ԵԱՀԿ կամ ռուսական դիտորդների տեղակայմանը շփման գծում․«Իհարկե ոչ ամբողջությամբ, բայց դրա որոշակի հատվածներում։ Հիմա, ինչպես հասկանում եմ, խոսքը գնում է ռուս սահմանապահների տեղակայման մասին։ Դրանք տարբեր կարգավիճակ ունեցող գործառույթներ են։ Շատ քիչ տեղեկություն կա այդ գործընթացի մասին, որ հնարավոր լինի ճշգրիտ վերլուծել ստեղծված իրավիճակը։ Ի սկզբանե ադրբեջանական զինվորների՝ Հայաստանի տարածք ներխուժման պահին, Հայաստանը կարող էր ներգրավել ռուսական 102-րդ բազայում տեղակայված մոտոհրաձգային բրիգադայի ու այլ ստորաբաժանումները, որոնք ռուսական բանակի ստորաբաժանումներ են, տեղակայված են Հայաստանում և մտնում են ռուս-հայկական համատեղ զորախմբի կազմի մեջ։ Ըստ գործող պայմանագրի՝ Հայաստանին ուղղված վտանգի կազմ սպառնալիքի դեպքում այդ համատեղ զորախումբն անցնում է հայկական ռազմական ղեկավարության կառավարման ներքո»։
Ըստ Ղուկասյանի՝ ի սկզբանե ռուսական զորքերը կարող էին գործադրվել սահմանում ստեղծված իրավիճակի ժամանակ մեր դիրքերը պաշտպանելու գործում․«Եթե դա չեղավ, սա վկայում է, որ մայիսի 12-ից հետո ստեղծված ճգնաժամն արհեստականորեն լարվածություն է ստեղծել։ Այն կարող էր ի սկզբանե չլինել»։
Մեր զրուցակցի դիտարկմամբ՝ և՛ սահմանային լարվածությունը և՛ սպառնալիքները, որ քաղաքացիական պատերազմ կլինի, եթե քաղաքացիները չքվեարկեն Նիկոլ Փաշինյանի օգտին այս հարցում մեծ դերակատարություն ունեցան ընտրությունների արդյունքների վրա․«Առհասարակ ՀՀ իշխանություններն ավանդաբար օգտագործում են շանտաժը ընտրությունների ժամանակ ու հետընտրական գործընթացներում։ Սերժ Սարգսյանը մշտապես սպառնում էր պատերազմով։ Այսօր օգտագործվեց արդեն և՛ արտաքին և՛ ներքին սպառնալիքները որպես գործիք իշխող ուժին քվեարկելու համար։ Բնականաբար վախի մթնոլորտում և այսպիսի շանտաժի պայմաններում քվեարկությունն աղերս չունի ժողովրդավարության հետ։ Դա է պատճառը, թե ինչու «Ազատ հայրենիք» դաշինքը չի ճանաչում ընտրության արդյունքները։ Կա մեծ տարբերություն ամբոխավարության և ժողովրդավարության միջև»։
Անդրիաս Ղուկասյանի խոսքերով՝ Ռուսաստանի, Ադրբեջանի ու Նիկոլ Փաշինյանի միջև կա համաձայնություն՝ գործել համատեղ, որպեսզի իրականացվի սահմանների դելիմիտացիա, դեմարկացիա, բացվեն կոմունիկացիները, Հայաստանի ու Ադրբեջանի միջև էլ կնքվի խաղաղ ու բարիդրացիական հարաբերությունների մասին պայմանագիր՝ թողնելով Արցախի կարգավիճակի հարցը առանց կարգավորման․«Այլ կերպ ասած՝ թողնելով Ադրբեջանի կազմում, ազգային փոքրամասնության կարգավիճակով։ Այդ տրամաբանությամբ շարժվում են և՛ Ալիևը, և ՌԴ պաշտոնատաևր անձինք և Նիկոլ Փաշինյանը։ Այդ տրամաբանությամբ է գործում նաև Թուրքիայի նախագահը։ Իմ թվարկած գործիչներն ուզում են կապիտալիզացնել պատերազմի արդյունքները, այսինքն ՝ նաև լուսանցքից դուրս թողնել ԱՄՆ-ն ու Ֆրանսիան։ Նաև՝ իրականացնել ամբողջությամբ այն պլանը, որը մտավ շրջանառության մեջ և որը կոչվում է Լավրովի պլան»,-եզրափակեց նա։
