«Չենք լռելու» երիտասարդական նախաձեռնությունը դիմում է Ազգային անվտանգության ծառայությանը «Խաղաղարար նախաձեռնությունների կովկասյան կենտրոն» հասարակական կազմակերպության ղեկավար Գեորգի Վանյանի դեմ քրեական գործ հարուցելու և նախաքննություն սկսելու խնդրանքով:
Վերջինս արդեն քանի տարի է` անխոչընդոտ իրականացնում է իր ազգադավ գործունեությունը:
Տականքներ, որոնք հանուն փողի պատրաստ են ծախել սեփական մորը, ամեն տեղ էլ կան, բայց Վանյանն արդեն անցել է թույլատրվածի բոլոր սահմանները: Ներկայանալով Հայաստանի քաղաքացիական հասարակության անունից` նա արդեն տևական ժամանակ ապահովում է ադրբեջանական հակահայկական քարոզչության հենասյունը Հայաստանում` տարբեր եվրոպական կառույցներում հայտարարելով, թե Հայաստանը օկուպացրել է Ադրբեջանի տարածքները:
«Չենք լռելու»-ի համբերության բաժակը լցրել է նրա վերջին հարցազրույցը ադրբեջանական լրատվամիջոցներին, որում «խաղաղարարը» կոչ է անում Հայաստանի իշխանություններին հրաժարվել ազատագրված տարածքներից: Բանն այն է, որ նմանատիպ հայտարարությունները հնարավորություն են տալիս ադրբեջանցիներին հղում կատարելու «հայ հասարակական գործչի» կարծիքի վրա և օգտագործելու այն իրենց ապատեղեկատվության մեջ:
Այս ամենը հիմք է տալիս ենթադրելու, որ Վանյանը կապ ունի ադրբեջանական հատուկ ծառայությունների հետ:
