Հայաստանի նախագահ Արմեն Սարգսյանը ստորագրել է արտաքին գործերի նախարար Արա Այվազյանի ազատման հրամանագիրը: Արմեն Սարգսյանի այդ քայլը փոքր ինչ տարօրինակ է, նրա այն քայլերի ֆոնին, երբ չէր ստորագրում ԶՈՒ ԳՇ պետի պաշտոնանկությունը կամ նոր պետի նշանակումը: Բանն այն է, որ Արա Այվազյանի հրաժարականի դեպքում էլ նախագահ Սարգսյանն ունի թերևս վերաբերմունք արտահայտելու շոշափելի պատճառ: Նվազագույնը վերաբերմունք արտահայտելու, եթե նկատի առնենք այն, որ նա իհարկե մեծ հաշվով իրավասու չէ արգելակել այդօրինակ գործընթացը, քանի որ չունի բավարար լիազորություն: Այդուհանդերձ, նախագահ Սարրգսյանին չի՞ հետաքրքրել նախկին նախարար Այվազյանի ելույթն առ այն, թե ինքը հեռանում է, այդպիսով ցույց տալով, որ ԱԳՆ կառույցը որևէ քայլ չի անի Հայաստանի ինքնիշխանության ու շահի դեմ: Ըստ էության, Արա Այվազյանի հրաժեշտի ելույթը իր մեջ պարունակում է բովանդակություն, որը առնչվում է Հայաստանի հանրապետության անվտանգությանն ու սահմանադրական կարգին: Իսկ Արմեն Սարգսյանը, լինելով Հայաստանի հանրապետության նախագահ, ըստ Սահմանադրության այդ կարգի երաշխավորն է: Իհարկե նա չունի բավարար լիազորություն այդ երաշխավորությունը արդյունավետ իրականացնելու համար, բայց, ինչպես դեռ նախագահ առաջադրվելիս ինքն էլ խոսում՝ կարող է ունենալ խոսքի իշխանություն, կամ խոսքի ուժ, բարձրաձայնելով առանցքային հարցերը: Ահա այդ համատեքստում էլ հետաքրքիր է, Արմեն Սարգսյանին չի՞ հետաքրքրել հարցը, թե ինչ ակնարկ կար Արա Այվազյանի հրաժեշտի ելույթում: Հանրությունն օրինակ տալիս է այդ հարցերը, այդ հարցը տվել է նաև վարչապետի պաշտոնակատար Փաշինյանի խոսնակը:
Հարցը հետևյալն է. Հայաստանի շահի և ինքնիշխանության դեմ ի՞նչ ռիսկային գործընթաց կա, որի մասին ակնարկում էր հեռացող նախարարը: Իսկ, եթե չկա, ապա ի՞նչն էր այդօրինակ ելույթի պատճառը, ի՞նչ էր ցուցանում առակը: Հեռացած նախարարը պետք է հրապարակային բացատրություն տա, որպեսզի հասարակությունը մի կողմից տեղյակ լինի հնարավոր վտանգի և սպառնալիքի առավել կոնկրետ ու առարկայորեն՝ դրա դեմ անհրաժեշտ քայլերը անելու հնարավորության համար, կամ, եթե այդպիսիք չկա և Արա Այվազյանի ակնարկն ուներ այլ իմաստ՝ հանրությունը զերծ լինի հնարավոր խուճապային մանիպուլյատիվ ազդեցության ռիսկերից: Այդպիսով, սահմանադրական կարգի և անվտանգության երաշխավոր Արմեն Սարգսյանը ունի՞ այդ հարցերի պատասխանները, ստացե՞լ է դրանք, կարո՞ղ է որևէ բացատրություն կամ պարզաբանում ներկայացնել, հաշվի առնելով, որ իր ստորագրությամբ նա ինքն էլ փաստորեն հանրության առաջ ստանձնել է նախարարի ելույթի և ակնարկի համար պատասխանատվություն:
